उद्घाटन खेलमा लुम्बिनी र प्रदेश २ भिड्ने
काठमाडौँ । प्रधानमन्त्री कप राष्ट्रिय महिला क्रिकेट प्रतियोगिताको खेल तालिका सार्वजनिक भएको छ ।
नेपाल क्रिकेट संघ (क्यान)ले सोमबार महिला पीएम कपको खेल तालिका सार्वजनिक गरेको हो ।
दाङको लमहीमा हुने प्रतियोगिताको उद्घाटन खेलमा लुम्बिनी प्रदेश र प्रदेश २ भिड्ने छन् । ८ दिन चाल्ने प्रतियोगितामा फाइनल बाहेक हरेक दिन दुई खेल हुनेछ ।
प्रतियाेगितामा ७ प्रदेशका टिम विभागिय टिम एपिएफको सहभागिता रहने छ ।
पौष ११ बाट सुरु हुने प्रतियोगिताको सेमिफाइनल पौष १७ र फाइनल खेल १९ गते हुनेछ ।
प्रतियोगिता टी-ट्वान्टी ढाँचामा हुनेछ । यसै प्रतियोगिताको लागि हाल हरेक प्रदेशले खेलाडी छनोट गर्दै आएको छ ।
यस्तै पौष ११ बाट काठमाडौंमा हुने भनिएको पुरुष पीएम कप भने महिलाको प्रतियोगिता पछि मात्र हुने भएको छ । पुरुषकाे प्रतियाेगिता दुई हप्ता सार्ने तयारीमा क्यान रहेको छ ।
आर्थिक अभाबका कारण पुरुषकाे प्रतियाेगिता सार्न लागिएकाे हाे ।
पुरुष पीएम कप काठमाडौँ र मुलपानीमा पुष ११ बाट आयोजना गर्ने तयारी थियो ।
दुई समुहमा विभाजन गरिएको ८ टिमले एकआपसमा खेल्दै शीर्ष २ टोली सेमिफाइनल पुग्ने छन् । समुह एको विजेताले समुह बीको उपविजेता र समुह बीको विजेताले समुह ए को उपविजेतासंग सेमिफाइनल खेल्ने छन् ।
समुह ए मा एपीएफ, प्रदेश २, कर्णाली प्रदेश र लुम्बिनी प्रदेश रहेका छन् । यस्तै समुह बीमा सुदुरपस्चिम प्रदेश, बागमती प्रदेश, गण्डकी प्रदेश र प्रदेश १ रहेका छन् ।
