कास्कीकाे विजयी शुरुवात

काठमाडौं । गण्डकी प्रदेश स्तरिय क्रिकेट प्रतियोगितामा कास्कीले विजयी शुरुवात गरेको छ ।

स्याङ्जालाई ७ विकेटले पराजित गर्दै कास्कीले सुखद सुरुवात गरेको हो ।

पोखरा रंगशालामा भएको उद्दघाटन खेलमा टस जितेर व्याटिङ गरेको स्याङ्जा ३८ ओभर ५ बलमा १ सय १९ रनमा समेटियाे । स्याङ्जाका विष्णु पाण्डेले सर्वाधिक ४१ रन बनाए । उनले ६३ बलमा ३ चौका प्रहार गरे । सौजन्य रेग्मीले २६ र लोकेन्द्र सोमाईले १० रन बनाउनु बाहेक अन्य खेलाडीले दोहोरो अङ्क जोड्न सकेनन् ।

कास्कीका विश्व कार्की र सुवास भण्डारीले समान ३/३ विकेट लिए । यस्तै, कृष्ण पौडेल, अमृत गुरुङ्ग, र विपिन खत्रिले समान १/१ विकेट हात पारे ।

१ सय २० रनको सामान्य लक्ष्य कास्कीले २८ ओभर ४ बलमा ३ विकेट गुमाएर पुरा गर्यो । कास्कीका अभिषेक थापाले ४३ तथा सुदिप पौडेलले २१ रन बनाए । अर्जुन कुमालले २२ रनको योगदान गरे ।

स्याङ्जाका सूर्य गुरुङले २ विकेट लिए ।

कास्कीका विश्व कार्की प्लेयर अफ द म्याच भए । जितसंगै कास्कीले लिग तालिकामा २ अंक जोडेको छ ।

राउण्ड रोविन लिगमा हुने प्रतियोगितामा शनिबार तनहुँ र नवलपुरबीच प्रतिस्पर्धा हुनेछ ।

यसअघि प्रतियोगिताको उद्घाटन गर्दै राष्ट्रिय खेलुकद परिषद्का सदस्य सचिव रमेश कुमार सिल्वालले पोखरा क्रिकेट मैदान क्रिकेट खेल्नका लागि संसारकै अलाैकिक खेल मैदान भएकाे बताउँदै यसको स्तरोन्नती गर्दै लैजानुपर्नेमा जोड दिएका थिए ।

उनले नेपालमा १० वटा ठूला क्रिकेट मैदान बन्ने क्रममा रहेको जनाउँदै आउँदो पाँच वर्षभित्र नेपालका सातै प्रदेशमा अन्तराष्ट्रिय क्रिकेट सञ्चालन गर्न सकिने मैदान तयार हुने दावी गरे ।