‘नयाँ ऐनले धेरै खेल संघमा गणतन्त्र आउँछ’

काठमाडौं । राष्ट्रिय खेलकुद परिषद् (राखेप)का उपाध्यक्ष शिव कोईरालाले राष्ट्रिय खेलकुद विकास ऐनको कार्यान्वयनसंगै धेरै खेलकुद संघमा गणतन्त्र आउने भएका छन् ।

खेलपाटीसंग विशेष संवाद गर्दै उपाध्यक्ष कोईरालाले नयाँ खेलकुद ऐनले संघका पदाधिकारीलाई दुई कार्यकाल भन्दा बढी बस्न नमिल्ने व्यवस्था गरेको उल्लेख गर्दै धेरै संघमा अब गणतन्त्र आउने बताए ।

‘नयाँ ऐनले संघका पदाधिकारीलाई दुई कार्यकाल भन्दा बढी नबस्न भनेको छ । धेरै संघमा अब गणतन्त्र आउँछ । जनवाद आउँछ ।’ कोईरालाले खेलपाटीसंग भने, ‘चालिसौं वर्षदेखि संघको नेतृत्व गरेर यसलाई लालपुर्जा बनाएर बसेका छन् । त्यो गलत भएको छ ।’

युवा तथा खेलकुद मन्त्रालयले खेल संघका विवाद समाधानका लागि उपाध्यक्ष कोईरालाको नेतृत्वमा विवाद समाधान समिति गठन गरेको छ । उपाध्यक्ष नेतृत्वको समितिले खेलकुद ऐन अनुसार विधिसम्मत नदेखिएका खेल संघलाई छानबीन गरी विधि सम्मत बनाउन सिफारिस गर्ने अख्तियारी समेत पाएको छ ।

उपाध्यक्ष कोईरालाले समय अनुसार खेल संघ रुपान्तरित हुनुपर्ने बताउँछन् ।

‘संघले पदाधिकारीले आफुलाई रुपान्तरण गर्नुपयो । डाईनोसर अनुसार आफुलाई परिवर्तन गर्न नसकेर लोप हुन भएन । लोप हुदाँ पनि प्रशंसा योग्य भएर विदा हुन पर्यो ।’ उनले भने ।

खेलकुद ऐनले एकै प्रकृतिका एक भन्दा बढी खेल संघ राखेपमा दर्ता नहुने व्यवस्था गरेको छ । ऐन कार्यान्वयनमा आएको तीन महिनाभित्र एकै प्रकृतिका एक भन्दा बढी संघलाई मिलाएर एउटै बनाउनुपर्ने ब्यवस्था नयाँ खेलकुद ऐनले गरेको छ । तर ऐन कार्यान्वयनमा आएको तीन महिनासम्म खेलकुद मन्त्रालय र राखेपले विवाद समाधानका लागि कुनै पहल गरेनन् । तर मंसिर १८ गते मन्त्रालयमा बसेको मन्त्रीस्तरीय बैठकले संघको विवाद समाधानका लागि कोईराला नेतृत्वको समिति गठन गरेको हो ।

समितिले प्रारम्भिक चरणमा १६ वटा संघलाई पत्र लेख्दै एक साता भित्र विमति भएका विषयमा एक आपसमा छलफल गरेर पत्र सहित उपस्थित हुन पत्राचार गरेको छ ।

‘ऐन अनुसार मापदण्ड नपुगेका धेरै संघले आफै हात झिक्छन् भन्ने सोचेको छु ।’ कोईरालाले भने, ‘विभिन्न समूहमा रहेका सक्रिय संघलाई एक ठाउँमा ल्याउन पहल गर्ने हो । सबैको चित्त बुझाउने कोशिश गर्ने हो । सहमती नबनेको खण्डमा परिषद्ले तदर्थ कमिटि बनाईदिने हो ।’

उपाध्यक्ष कोईरालाले अनुदान लिन र विदेशमात्र जान खोलिएका संघलाई राखेपले गम्भिर रुपमा लिने समेत बताए । उनले खेलकुद ऐन अनुसार मापदण्ड नपुगेका खेल संघहरु स्वत क्लबमा रुपान्तरित हुने उल्लेख गरे ।

‘विदेश जानलाई खोलिएका र अनुदान लिन खोलिएका संघ आफैले बन्द गर्नुपर्छ । नत्र परिषद्ले हेर्छ । परिषद्ले चाहिने संघलाई राख्ने र नचाहिनेलाई क्लबमा रुपान्तरण गर्छ ।’ कोईरालाले भने ।