काठमाडौं । कोरोना महामारीको कारण ठप्प रहेको नेपाल क्रिकेट बिहीबारबाट सुरु भएको छ ।
नेपाल क्रिकेट संघ (क्यान)ले झन्डै ९ महिनापछि खेलाडीको बन्द प्रशिक्षण सुरु गरेको हो ।
बन्द प्रशिक्षणमा क्यानले २२ खेलाडी आह्वान गरेको थियो । तर १८ खेलाडीको कोरोना प्रशिक्षण (पीसीआर) गर्दा तीन जना खेलाडीमा पोजेटिभ नतिजा देखिएको थियो ।
कप्तान ज्ञानेन्द्र मल्ल, उपकप्तान दिपेन्द्र सिंह ऐरी र रोहित कुमार पौडेल संक्रमित बनेको नतिजा आयो ।
लगत्तै क्यानले थप ५ खेलाडीलाई बन्द प्रशिक्षणमा बोलाएर बिहीबारबाट अभ्यास सुरु गरेको छ । हाल २० खेलाडी त्रिवि मैदान र जिम हलमा प्रशिक्षणमा रहेका छन् । प्रशिक्षकका रुपमा जगत टमटाले नेपाली टिम हेरिरहेका छन् ।
लामो समयपछि मैदान फर्कन पाउँदा खेलाडी उत्साहीत छन् । व्यक्तिगत रुपमा घरमै अभ्यास गरिरहेका खेलाडी समूहमा मैदान उत्रदा पारिवारिक वातावरण बनेको छ ।
लामो समयपछि प्रशिक्षण सुरु गरेको नेपाली टिमको क्याम्पलाई मुख्य प्रशिक्षक जगत टमटा अवस्था अनुसारको क्याम्प भन्न रुचाउँछन् । जसमा खेलाडीहरु घुलमिल हुने र लय समात्ने प्रयासमा हुनेछन् । जसले टिमको तालमेल मिलाउन मद्दत गर्दछ । टिमको गति कायम राख्न यस्तो क्याम्प निकै आवश्यक रहेको टमाटा बताउँछन् ।
'महामारीपछि खेलाडी मैदान फर्किएका छन् । क्याम्प राख्नुको उद्धेश्य खेलाडीको तालमेल मिलाउनु हो । खेलाडी व्यक्तिगत रुपमा क्रिकेटमा थिए । तर मुख्य टिमको गति महत्पूर्ण हो ।’ टमटा भन्छन्, 'अर्को फिटनेसमा कभर गराउने र खेलाडीले यस समयमा रमाइलो गरुन भन्ने लक्ष्य हो । मुख्य टिम भनेको मुटु हो, त्यसैलाई लयमा ल्याउन खोजेको हो । यस्तो क्याम्पलाई ‘कन्जस्टिङ’ र ‘कन्डिसनिङ’ क्याम्प भनिन्छ ।’
तत्काल नेपालको कुनै अन्तराष्ट्रिय खेल छैन । महामारीको स्थिती सामान्य रहे सम्भवत नेपालले आउने मार्चमा सिरिज खेल्ने तयारी छ । त्यसैले यस्तो क्याम्पले खेलाडी तथा टिमलाई निकै फाइदा हुने टमटा बताउँछन् ।
'यो कन्डिसनिङ क्याम्प हो, यसमा टिमलाई निर्माण गर्ने हो । अर्को क्षमता, गति र प्रतिक्रियामा काम गर्छौं । यसले गर्दा खेलाडी पुनः लयमा फर्किने विश्वास छ ।’ उनले थपे, 'अहिले खेलाडी रमाईलो गरुन, लयमा आउन । जसले गर्दा आउने मार्चमा सहज हुन्छ ।’
लामो समयपछि खेलाडी मैदान फर्किएका कारण खेलाडीको गति र फिटनेसमा समस्या देखिएको टमटा बताउँछन् ।
घरमा फिट र लयमा रहन प्रयास गरेपनि राष्ट्रिय खेलाडीका लागि त्यो प्रयाप्त नहुने उनको भनाई छ । खेलाडीलाई पुरानो लयमा ल्याउन समेत १५÷२० दिन लाग्ने उनले जानकारी गराए ।
'खेलाडीको चालमा फरक छ, फेब्रुअरीमा खेल्दा चाल अर्कै थियो, अहिले अर्कै छ । खेलाडीले व्यक्तिगत रुपमा घरैमा उपलब्ध सामानले अभ्यास गरेका होलान् तर शरिरको गति, छिटो आउने प्रतिक्रिया जस्ता क्षमता फरक देखिएको छ ।’ टमटा भन्छन्, 'लामो समय अभ्यास नभएको कारण यस्तो भएको हो । कम्तीमा जनवरीसम्म खेलाडीहरुको खेलको गति फर्काउने लक्ष्य हो । टिमको सन्तुलन महत्वपूर्ण छ, त्यसलाई फर्काउने कोसिसमा छौं ।’
'फिटनेसमा समेत फरक पन आएको छ । व्यक्तिगत फिटनेस गर्नु र टिममा गर्नु फरक कुरा हो । व्यक्तिगत रुपमा खेलेर फिट पाउन मुस्किल हुन्छ । यसअघिको खेलमा खेलाडीमा देखाएको फिटनेस तत्काल खेलाडीमा आउने सम्भावना छैन । त्यसैमा काम गर्दै छौं ।’ उनले भने, 'अब पुनः लयमा फर्किन १५÷२० लाग्छ । त्यसका लागि खेल्नुपर्छ, खेलको परिदृष्य हुन्छ । सबै मिलाएर अघि बढ्ने लक्ष्यमा छौं ।’
लामो समय क्रिकेट नहुदाँ त्यसको असर प्रशिक्षणमा नदेखिने टमाटा बताउँछन् ।
'प्रशिक्षणमा समस्या छैन । ‘हार्ड’ क्याम्प पनि हैन, खेलाडीले यो समय रमाइलो गरोस, टिमको गति कायम रहोस, खेलाडीको गति फर्कियोस भनेर क्याम्प बसेको हो । कसरी हुन्छ खेलाडीको व्यक्तिगत प्रदर्शनसंगै टिमलाई लयमा ल्याउने काम गरिरहेका छौं ।’ उनले थपे ।
