जिम्बावेद्वारा पाकिस्तानलाई २ सय ७९ रनको लक्ष्य

एजेन्सी । पाहुना टिम जिम्बावेले तेस्रो तथा अन्तिम एकदिवसीय क्रिकेटमा पाकिस्तानलाई जितका लागि २ सय ७९ रनको लक्ष्य दिएको छ ।

रावलपिन्डीमा मंगलबार टस जितेर पहिले ब्याटिङ गरेको जिम्बावेले ५० ओभरमा ६ विकेट गुमाएर २ सय ७८ रन बनायो ।

जिम्बावेका लागि सिन विलियम्सले अविजित रहदै १ सय १८ रनको शतकीय इनिङ्स खेले । विलियम्सको यो चौंथो एकदिवसीय शतक हो ।

यस्तै ब्रेन्डन टेलरले ५६ रनको अर्धशतकीय इनिङ्स खेले । शिकन्दर राजाले ४५ रन जोड्दा वेस्ली माधिभेरेले ३३ रन बनाए ।

पाकिस्तानका मोहमद हस्नैन एक्लैले ५ विकेट लिए । वाहब रियाजले १ विकेट लिए ।

आईसीसी पुरुष क्रिकेट विश्वकप सुपर लिग अन्तर्गतको ३ खेलको सिरिज पाकिस्तानले २-० ले जितिसकेको छ ।

तेस्रो खेल जित्दै पाकिस्तान सिरिज क्लिन स्विप गर्न चाहन्छ । जिम्बावे भने अन्तिम खेल जित्दै सान्त्वना जित निकाल्न चाहन्छ ।

एकदिवसीय सिरिज पछि पाकिस्तानले जिम्बावेसँग ३ खेलको टी-ट्वान्टी सिरिज खेल्नेछ ।