सिताको ब्याटिङ वरीयतामा सुधार

काठमाडौं । अन्तराष्ट्रिय क्रिकेट परिषद (आईसीसी) को महिला टी-ट्वान्टी ब्याटिङ वरीयतामा नेपालकी उपकप्तान सिता राना मगरको वरीयता सुधार भएको छ ।

आईसीसीले बिहीबार सार्वजनिक गरेको नयाँ वरीयतामा सिताको ब्याटिङ वरीयता तीन स्थान सुधार भएको हो ।

नयाँ वरीयतामा सिता ८५ औं स्थानमा रहेकी छिन् । सिता अघिल्लो वरीयतामा ८८ औं स्थानमा रहेकी थिइन् ।

सिता वरीयतामा पर्ने एक्लो नेपाली महिला खेलाडी हुन् ।

यस अघि पूर्व कप्तान नेरी थापा बलिङतर्फको शीर्ष सय भित्र पर्दै आएकी थिइन् । तर, यस पटक उनी शीर्ष सयमा पर्न असफल भएकी छिन् ।

महिला टी-ट्वान्टी वरीयतामा नेपाल १४ औं स्थानमा रहेको छ ।

नेपालले घरेलु भूमिमा भएको १३ औं दक्षिण एसियाली खेलकुद (साग) पछि कुनै अन्तराष्ट्रिय खेल खेलेको छैन ।