पोखरा । पशुपतिघाट पोखरा अन्तर्राष्ट्रिय क्रिकेट रंगशालाको विस्तृत परियोजना प्रतिवेदन (डीपीआर) तयार भएको छ ।
पोखरा महानगरपालिका-३३ स्थित पशुपतिघाटमा गण्डकी प्रदेश सरकारले निर्माण गर्ने रंगशालाको बिआरएस इन्जिनियरिङ सोलुसनले डीपीआर तयार गरेको हो ।
बिआरएसले तयार गरेको डीपीआर अनुसार रंगशालाको निर्माण लागत १ अर्ब ६३ करोड ६३ लाख रुपैयाँ लाग्नेछ ।
डीपीआर का लागि प्रदेशले वैशाखमा बिआरएसलाई चयन गरेको थियो । बिआरएसले प्रारम्भिक डीपीआर असारमा बुझाएको थियो ।
प्रारम्भिक डीपीआर अनुसार रंगशाला निर्माणमा १ अर्ब १९ लाख खर्च लाग्ने अनुमान गरिएको थियो । तर, प्रदेशले रंगशालाको सुविधा थपेर अत्याधुनिक बनाउने भनेपछि १ करोड ६३ करोड बराबरको खर्च लाग्ने गरी नयाँ डीपीआर बनेको सामाजिक विकास मन्त्रालयका प्रवक्ता एवं युवा तथा खेलकुद महाशाखाका उपसचिव तेजप्रसाद काफ्लेले बताए ।
पशुपतिघाटको १७४ रोपनी जग्गा रंगशाला बनाउन सरकारले भोगाधिकार प्रदेशलाई स्वीकृति दिएपछि रंगशाला निर्माणको प्रक्रिया थालिएको हो। डीपीआर अनुसार सेती नदीको किनारमा रहेको मैदानका लागि १२३ रोपनी जग्गामात्र आवश्यक छ ।
सेती नदीले पहिलेका वर्षमा पूर्वतर्फ कटान गर्ने गर्थ्यो । सोही अनुरुप पश्चिममा रंगशाला निर्माण गर्ने सोच प्रदेश सरकारको थियो । तर, यस वर्षको लगातारको वर्षाले पश्चिममा पनि कटान गरेपछि बिआरएसले जग्गा संरक्षणका लागि पनि डीपीआर बनाउने जनाएको छ ।
बिआरएसका इन्जिनियर विशाल पुनमगरले पश्चिममा कटान गरेकाले आउँदा वर्षमा पनि रंगशालाका संरचनातर्फ कटान गर्न सक्ने भएकाले डिपिआर बनाइने बताए ।
‘पिच बनाउने काम सकेपछि कटान गर्दा हुन सक्ने क्षतिलाई हेर्दै जग्गा संरक्षणका लागि डीपीआर बनाउँदै छौ,’ पुनले भने ।
यसका लागि भौतिक तथा पूर्वाधार मन्त्रालयका प्राविधिकसँग छलफल भइरहेको उनले बताए । अबको एक महिनामा नदी र त्यहाँका अन्य प्राकृतिक स्रोतबारे अध्ययन सकाउने पुनले बताए ।
निर्माण सुरु गर्नुअघि वातावरणीय प्रभाव मूल्याकंन गरिने मन्त्रालयका प्रवक्ता तेजप्रसाद काफ्लेले जनाए । वातावरण संरक्षण ऐन २०७७ को प्रावधान अनुसार कुनैपनि मैदान तथा मानिस धेरै जम्मा भइरहने ठाउँमा वातावरणीय प्रभाव मूल्याकंन आवश्यक पर्छ ।
डीपीआर अनुसार रंगशालाभित्र अभ्यास नेट्स, पेभेलियन, मिडिया बक्स, डिस्प्ले बोर्ड, पार्किङ तथा अन्य संरचना बनाइनेछन् । रंगशाला निर्माणको पहिलो चरणमा कंक्रिट डिफेन्स वाल लगाइने काफ्लेले बताए ।
आर्थिक वर्ष २०७६÷७७ का लागि प्रदेश सरकारले रंगशाला निर्माणका लागि २ करोड रुपैयाँ विनियोजन गरेको छ । कुल अनुमानित खर्चको १।२३ प्रतिशत रहेको बजेटले यस वर्षमा जग्गा संरक्षणको मात्र काम हुन सक्छ । तर मन्त्रालयका प्रवक्ता काफ्ले भने आगामी वर्ष मुख्यमन्त्री कार्यालयले बजेट बढाउने आश्वासन दिएकाले बजेट बढ्नेमा आशा देखाउँछन् ।
उनका अनुसार अबको २ वर्षमा मैदान खेल्न तयार हुनेछ र बाँकी संरचना निर्माणका काम क्रमानुसार बढ्नेछ । दोस्रो चरणमा लेबलिङको काम हुनेछ । बिआरएस इन्जिनियरिङका इन्जिनियर विशाल पुन पर्याप्त बजेट पाए ३२ महिनामा काम सक्ने जनाउँछन् ।
-1746894755.jpeg)
