न्यु समिट र गोल्डेन पिकको जित

काठमाडौं । न्यु समिट र गोल्डेन पिकले १३ औं क्विक्स ग्रिनल्यान्ड अन्तरविद्यालय बास्केटबल प्रतियोगितामा जित हात पारेका छन् ।

टोखास्थित आयोजक विद्यालयको कोर्टमा भएको सिनियर छात्रको खेलमा न्यु समिटले काठमाडौं विद्याकुञ्ज स्कुललाई ३१–२१ ले पराजित गर्यो । विजेताका शशांक महर्जनले १९ अंकको योगदान दिए । यसैगरी गोल्डेन पिकले निर्मल बाटिकालाई ३३–२० स्तब्ध बनायो ।

सिनियर छात्रकै अर्को खेलमा एनईएले बुढानीलकण्ठ स्कुललाई ३७–१९ ले पराजित गर्यो  । विजेताका सुगम पाण्डेले १८ अंक बटुले । यसैगरी सेबले एआईएमाथि ५०–२३ को फराकिलो जित निकाल्यो । यस्तै इआईएले नेसनल युनाइटेडलाई ४३–२९ ले पाखा लगायो । विजेताका साजन भुजेलले १६ अंक बटुले ।

जुनियर छात्रमा एनईएले लक्ष्मीपुरलाई १९–१० ले पराजित गर्दा समिप पाण्डेले ६ अंक जोडे । यस्तै एन्जल हार्टले गोल्डेन पिकलाई ३१–२४ ले हरायो । एन्जल हार्टका ओयासिस केसीले ९ अंकको योगदान गरे । यसैगरी आयोजक ग्रिनल्यान्डले ओडीसीलाई १६–१० ले पराजित गर्दा सुवास अधिकारीले ६ अंक बटुले । जुनियरतर्फकै अर्को खेलमा लाली गुराँसले एन्जल हार्टलाई ७–५ ले स्तब्ध बनायो ।

यसैगरी सिनियर छात्राको एक मात्र खेलमा एचएचसीएले सोर्ससेन्ट स्कुललाई ३४–१० ले पराजित गर्यो । विजेताका विष्णु भुजेलले सात अंक बटुलिन । नौ दिने प्रतियोगितामा सिनियर छात्रतर्फ १६, जुनियर छात्रमा १६ र सिनियर छात्रामा १२ टोलीको सहभागिता छ ।