सिटीनै मेस्सीको राम्रो विकल्प – रिभाल्डो

एजेन्सी । बार्सिलोनाका पूर्व स्टार रिभाल्डोले म्यान्चेष्टर सिटीनै मेस्सीको सबैभन्दा राम्रो विकल्प रहेको बताएका छन् ।

मेस्सीले बार्सिलोनालाई क्लब छाड्ने जानकारी गराईसकेका छन् ।

रिभाल्डोले अर्जेन्टिनी स्टार आफ्ना पूर्व प्रशिक्षकसंग जोडिने सम्भावना अधिक रहेको बताए ।

प्रशिक्षक पेप ग्वार्डीओलाले सन् २००८ देखि २०१२ सम्म बार्सिलोनाको नेतृत्व गरेका थिए । उनको नेतृत्वमा मेस्सीले असाधारण उपलब्धि हात पारेका थिए । दुवै मिलेर क्याटलान क्लबलाई युरोपको सर्वोकृष्ट क्लब बनाउन सफल भएका थिए ।

रिभाल्डोका अनुसार मेस्सी इङ्ल्याण्ड आएको खण्डमा ग्वार्डीओलाले मेस्सीबाट उत्कृष्ट खेल प्राप्त गर्नेछन् ।

द मिररका अनुसार रिभाल्डोले भनेका छन्, ‘म्यान्चेष्टर सिटीनै लियोनल मेस्सीको सबैभन्दा राम्रो विकल्प हो ।’

‘उनी ३३ बर्षका भए । तर उनको क्षमता र स्तर अझै बढी छ । उनी केही बर्ष अझै उत्कृष्ट फर्ममा रहनेछन् । उनी इङ्ल्याण्डमा चाँडै छाउन सक्छन् ।’ उनले भने ।

‘मेस्सीको क्षमताबारे ग्वार्डीओलालाई गहिरो ज्ञान छ । उनले मेस्सीसंग चाँडै सहकार्य गर्न सक्छन् र टिमलाई उत्कृष्ट बनाउन सक्छन् ।’ रिभाल्डो भन्छन् ।

‘म पनि मेस्सीलाई बिचमा राखेर बाँकी टिमको कल्पना गर्दछु । उनको प्रतिभा कुनैपनि समय र स्थानमा फर्कन सक्छ । मलाई लाग्छ, उनी प्रिमियर लिगमा खेल जिताउने प्रर्दशन गर्न सक्छन् ।’ उनले भने ।

मेस्सीले आफुलाई फ्रि–ट्रान्सफर अन्तर्गत छाड्न क्लबलाई अनुरोध गरेका छन् । तर क्लबले मेस्सीलाई निशुल्क छाड्न सकिने सम्झौता जुनमै सकिएको बताएको छ ।

बार्सिलोनाले मेस्सीलाई अनुबन्धन गर्न खोज्ने क्लबले ६ सय ३० मिलियनको रिलिज क्लज तिर्नुपर्ने बताएको छ ।

रिभाल्डोले सन् १९९७ देखि २००२ सम्म बार्सिलोनाबाट खेलेका थिए । उनले मेस्सी र क्लबबीच देखिएको समस्या चाँडै हल हुने बताए ।

पछिल्लो सिजन उपाधि विहिन भएपछि मेस्सी बार्सिलोनामा निराश छन् । च्याम्पियन्स लिगको क्वार्टरफाइनलमा बायर्न म्युनिखसंग ८–२ ले पराजित भएपछि उनले क्लब छाड्ने निर्णय गरेका हुन् ।