मेस्सी लैजान तीन क्लब तयार

एजेन्सी । लियोनल मेस्सी अनुबन्धनमा तीन क्लब तयार देखिएका छन् ।

स्पेनिस क्लब बार्सिलोनामा आफ्नो भविष्य अनिश्चित देखेका मेस्सीलाई अनुबन्धन गर्न युरोपका तीन ठुला क्लब तयार देखिएका हुन् ।

बार्सिलोनामा आफ्नो भविष्यलाई लिएर मेस्सीले नयाँ प्रशिक्षक रोनाल्ड कोम्यानसंग छलफल गरिसकेका छन् । उनले बार्सिलोना भन्दा आफ्नो भविष्य बाहिर रहेको बताईसकेका छन् ।

मेस्सीले क्लब छाड्ने संकेत गरेसंगै तीन क्लब यस समर ट्रान्सफरमा उनलाई अनुबन्धन गर्न चाहेका छन् । म्यान्चेष्टर सिटी, पेरिस सेन्ट जर्मेन (पीएसजी) र युभेन्ट्स यस बर्ष मेस्सीलाई अनुबन्धन गर्न निकै ईच्छुक देखिएका हुन् ।

क्याटलान क्लबमा उपाधि विहिन सिजन बिताएपछि मेस्सी बार्सिलोनाबाट टाढिएका छन् । ३३ बर्षिया फरवार्डले बार्सिलोनाका नयाँ प्रशिक्षक कोम्यानसंग भेटेर आफु क्लबमा बस्ने भन्दा बाहिरिने सम्भावना बढी रहेको बताईसकेका छन् ।

स्पेनिस आउटलेट पत्रिका स्पोर्ट्सका अनुसार पीएसजी, ईन्टर र युभेन्ट्स क्लब ३३ बर्षिया फरवार्डका लागि विश्व कीर्तिमानी मुल्य हाल्न तयार छन् । तीन वटै क्लब कुनैपनि मुल्यमा मेस्सीलाई क्लबमा हस्ताक्षर गर्न लालायित देखिएका छन् ।

ईन्टर मिलानले ईटालीमा तिर्नुपर्ने कम करलाई आधार बनाउदै मेस्सीलाई अनुबन्धन गर्न सकिने विश्वास लिएको छ । उसले बार्सिलोनासंग जोडिएका लौटारो मार्टिनेजलाई मेस्सी अनुबन्धनका लागि उपयोग गर्न सक्नेछ ।

पीएसजीले सन् २०१७ मा नेयमारलाई बार्सिलोनाबाट विश्व कीर्तिमानी मुल्यमा अप्रत्यासीत रुपमा फ्रान्समा लगेको थियो । कतारी लगानीको लिग वान क्लब पीएसजी सर्वकालिन महान खेलाडी मेस्सीलाई अर्को ठुलो मुल्यमा अनुबन्धन गर्न चाहेको देखिन्छ ।

युभेन्ट्स भने अर्का फरवार्ड क्रिस्टियानो रोनाल्डोको सहयात्री बनाउने उद्धेश्य स्वरुप मेस्सी अनुबन्धन गर्न खोजिरहेको छ । स्पेनमा रहदा मेस्सीसंग रियल मड्रिडबाट प्रतिस्पर्धा गरेको रोनाल्डोसंग अर्जेन्टिनी फरवार्डलाई जोड्न सकिने युभेन्ट्सको विश्वास छ ।

मेस्सी र रोनाल्डोले आपसमा मिलेर १२ सय गोल पुरा गरेका छन् । दुवै खेलाडी मिलेर सिरि एमा नयाँ यात्रा सुरु गर्न सक्ने युभेन्ट्सको विश्वास छ ।

स्पेनबाट प्राप्त रिपोर्ट अनुसार प्रिमियर लिग क्लब सिटीसंगै म्यान्चेष्टर युनाईटेड र चेल्सी समेत मेस्सीलाई अनुबन्धन गर्न सक्षम देखिएका छन् ।