एजेन्सी । प्रिमियर लिगको च्याम्पियन बनिसकेको लिभरपुललाई क्लबका लिजेण्ड सर केन्नी डग्लीसले उपाधि ट्रफी प्रदान गर्ने भएका छन् ।
लिजेण्ड डग्लीसले बुधबार (आज) राति एनफिल्डमा कप्तान जोर्डन हेन्डरसनलाई उपाधि ट्रफी प्रदान गर्ने भएका हुन् ।
लिभरपुलले लिग अन्तर्गत चेल्सीविरुद्धको हुने खेल पश्चात उपाधि ट्रफी पाउनेछ ।
लिभरपुलले ३० वर्ष पछि प्रिमियर लिगको उपाधि उचालेको हो । यस अघि लिभरपुलले सन् १९८९/९० को सिजन उपाधि जितेको थियो ।
ट्रफी प्रदान गर्न लागेका डग्लीसकै प्रशिक्षणमा लिभरपुलले १९९० मा उपाधि उचालेको हो । उनै डग्लीसले अहिलेका कप्तान हेन्डरसनलाई टोलीमा अनुबन्ध समेत गराएका थिए ।
दोस्रो पटक लिभरपुलको प्रशिक्षक रहदा २०११ मा डग्लीसले हेन्डरसनलाई प्रिमियर लिगकै अर्को क्लब सन्डरल्यान्डबाट अनुबन्ध गरेका थिए ।
‘डग्लीस फुटबलका एक नक्षत्र हुन । फुटबलमा लामो अनुभव र लगाव भएका व्यक्ति हुन,’ लिभरपुलका कप्तान हेन्डरसनले भने, ‘लामो समयपछि मात्र क्लबले उपाधि उचाल्न पाएको छ । उपाधि उचाल्ने लक्ष्य ३० वर्ष पछि मात्र मिलेको छ । पर्खाइको समय अन्त्य भएको छ ।’
विश्व भर महामारीको रुपमा लिएको कोरोना भाइरस (कोभिड–१९) का कारण लिभरपुलले आफ्ना समर्थक विना उपाधि उचाल्न लागेको हो । जसले गर्दा लिभरपुल एक कोणबाट निराश देखिएको छ ।
‘उपाधि उचाल्न कुर्नु परेको समयले पूर्णविराम लागेको छ । क्लबका लागि यो ठूलो सफलता हो,’ लिभरपुलका कप्तान हेन्डरसनले थपे, ‘समर्थकमाझ उपाधि उचालेको अनुभव लिन कोरोना भाइरस तगारो भएको छ । यद्यपि च्याम्पियन हुन पाउँदा खुसी लागेको छ ।'
३० वर्षिय हेन्डरसनको कप्तानीमा टोलीले सिजनमा उत्कृष्ट खेल पस्कदै उपाधि उचाल्न लागेको हो । हेन्डरसनले सिजनका ३० खेलमा कप्तानी आर्म ब्याण्ड लगाउँदा चार गोल गरेका छन् । त,र पछिल्ला चार खेलमा भने उनी घुँडाको चोटका कारण मैदान बाहिर रहेका छन् ।
