सरकारको स्विकृतिले खेलाडी र प्रशिक्षक खुसी

काठमाडौं । सरकारले करिब तीन महिनादेखि ठप्प खेलकुद गतिविधि सुरु गर्न अनुमती प्रदान गरेको छ । सोमबार बसेको मन्त्रिपरिषद्को बैठकले अन्तराष्ट्रिय खेलकुदमा सहभागीता जनाउने टिमको प्रशिक्षण सुरु गर्न अनुमती दिने निर्णय गरेको हो ।

सरकारले प्रारम्भिक खेल र अन्तराष्ट्रिय प्रतियोगितामा सहभागीता जनाउने टिमको प्रशिक्षण सुरु गर्न स्विकृति त दिएको छ, तर निकै ढिला हुने गरि ।

यसअघि अखिल नेपाल फुटबल संघ एन्फाले बारम्बार खेलकुद मन्त्रालय र राष्ट्रिय खेलकुद परिषद् (राखेप)लाई प्रशिक्षणको स्विकृतिका लागि आग्रह गर्दै आएको थियो ।

अन्तिम समय मन्त्रीपरिषद्को निर्णयसंगै एन्फाले प्रशिक्षणको अनुमती पाएको छ, तर अभ्यासका लागि भदौको पहिलो सातानै पर्खन पर्ने भएको छ ।

नेपालले आगामी महिना एसियाली पावर हाउस अष्ट्रेलिया, जोर्डन र चाईनिज ताईपेसंग विश्वकप छनोटको दोस्रो चरणको होम गेम खेल्दैछ, दशरथ रंगशालामा ।

यसअघि ए डिभिजन लिग समाप्त भएसँगै एन्फाले फागुन ३ गते राष्ट्रिय टिमलाई तयारीका लागि बोलाएको थियो । तर विश्वभर फैलिएको कोराना महामारिका कारण एन्फाले तयारी रोेकेको थियो भने चालू अवस्थामा रहेको बी डिभिजन लिग समेत स्थगित गर्नुपरेको थियो ।

कोरोनाले स्थगित अभ्यास एन्फाले भदौ १ गतेबाट सुरु गर्ने तयारी गरेकोे छ । एन्फा चाहन्थ्यो सरकारले यसै हप्ताबाट प्रशिक्षणका लागि स्विकृति प्रदान गरोस । तर आफुले चाहेको र सोचे जस्तो नहुँदा एन्फाका पदाधिकारी असन्तुष्ट देखिन्छन् । तर ढिलै भएपनि प्रशिक्षणमा फर्कने निर्णय हुदाँ खेलाडी भने खुसी देखिन्छन् ।

‘ढिलै भएपनि तयारी गर्न पाउने भएका छौं । धेरै खुसी छु ।’ राष्ट्रिय टिमका स्ट्राइकर भरत खवास भन्छन् ।

खेलाडी मात्रै नभएर प्रशिक्षक समेत अभ्यासको स्विकृति पाएसँगै मख्ख छन् ।

महिला फुटबल टिमका पुर्व मुख्य प्रशिक्षक तथा पुर्व अन्तराष्ट्रिय खेलाडी हरि खड्का भन्छन्, ‘यो निर्णय स्वागत योग्य छ । किनकी सबै जना प्रशिक्षण हुन्छ कि हुँदैन भन्ने दोधारमा थिए । अब तयारी गर्न पाएका छौं ।’

सन् २०२२ कतारमा आयोजना हुने फिफा विश्वकप छनोटका लागि नेपालले पहिलो पटक सिधै दोस्रो चरणमा खेल्न पाएको हो । समूह बी मा रहेको नेपाल ५ खेल खेल्दै ३ अंक जोड्न सफल भएको छ ।

यसअघि मैदान अभावका कारण नेपालले ४ वटै सुरुवाती खेल अवे मैदानमा खेलेको थियो । कुवेतविरुद्ध मैदान अभावका कारण नेपालले होम खेल भुटानमा गएर खेलेको हो ।

सरकारको निर्णयले राष्ट्रिय टिमका युवा खेलाडी समेत खुसी छन् । दैनिकी रुपमा घरमै रहेर अभ्यास गरिरहेका अभिषेक रिजाल सरकारको निर्णयले खुसी देखिन्छन् ।

‘धेरै दिनदेखि एक्लै अभ्यास गरेको थिए । अब भने टिमका साथीसँग अभ्यास गर्न पाउने भएका छौं । खुसी छु ।’ १३ औं सागका स्वर्ण पदक विजेता अभिषेक भन्छन् ।

सरकारको निर्णयसँगै एन्फाले अव स्वास्थ्य मन्त्रालय र फिफाको निर्देशन अनुसार खेलाडीलाई अभ्यासमा बोलाउनुपर्नेछ । अहिले आधा भन्दा बढि खेलाडी उपत्यका बाहिर छन् ।

एन्फाले खेलाडीलाई एन्फा होस्टेल राख्ने र पीसीआर परिक्षण गरेर मात्र प्रशिक्षणमा सामेल गर्ने बताएको छ ।