श्रीसंतले केरेलाबाट रणजी ट्रफी खेल्ने

एजेन्सी । भारतीय क्रिकेटर शान्ताकुमारन श्रीसंत उत्कृष्ट बलर हुन् । भारतले सन् २००७ को टी-ट्वान्टी विश्वकप जित्दा श्रीसंत मुख्य फास्ट बलरको रूपमा रहेका थिए ।

तर, सन् २०१३ को इन्डियन प्रिमियर लिग (आईपीएल) मा म्याच फिक्सिङको आरोप लागेपछि उनी प्रतिबन्धमा छन् ।

भारतीय क्रिकेट बोर्डले उनीसँगै अन्य दुई खेलाडीलाई आजीवन प्रतिबन्ध गरेको थियो । आजीवन प्रतिबन्धपछि श्रीसंतले अदालतमा मुद्दा दर्ता गराएका थिए ।

पछि उनको प्रतिबन्ध ७ वर्षमा घटेको थियो । श्रीसंतको प्रतिबन्ध यही सेप्टेम्बरमा सकिँदै छ ।

फास्ट बलर श्रीसंत सेप्टेम्बरमा प्रतिबन्ध सकिएपछि क्रिकेटमा पुनरागमन गर्ने तयारीमा छन् । प्रतिबन्ध सकिनु अगावै उनी व्यवसायिक क्रिकेटमा पुनरागमन गर्ने पक्का भएको छ ।

श्रीसंत आउने सिजनमा रणजी ट्रफीबाट व्यवसायिक क्रिकेटमा फर्किन लागेका हुन् । उनलाई रणजी ट्रफी टिम केरेलाले आबद्ध गरेको छ ।

'मलाई मौका दिएकोमा म केरेला क्रिकेट प्रति निकै आभारी छु । मेरो फिटनेसमा सुधार गर्दै खेलमा पुनरागमन गर्नेछु,' श्रीसंतले भने, 'अबको समय सबै विवादलाई आराम दिने बेला हो ।'

यस्तै केरेलाका प्रशिक्षक तिनु योहानालेश्रीसंतको आगमनले टिममा थप उर्जा मिल्ने र टिम बलियो बनेको बताएका छन् ।

३७ वर्षे श्रसंतले भारतको लागि २७ टेष्ट, ५३ एकदिवसीय र १० टी-ट्वान्टी अन्तराष्ट्रिय खेलेका छन् ।

यस अघि उनले आफ्नो प्रतिबन्धबारे दुःख पोखेका थिए ।

उनले आफु विगत ६ वर्ष ६ महिनाबाट लकडाउनमा रहेको बताएका थिए ।

'हेर्नुस, सबैजना गत महिनाबाट लकडाउनमा छन् तर म ६ वर्ष ६ महिनाबाट व्यवसायिक रुपमा लकडाउनमा छु,' श्रीसंतले भने, 'यस समय म कामसँग सम्बन्धित फिल्म, टिभी शो हेर्ने गर्छु । तर जुन खेललाई मैले माया गर्छु त्यो म बाट टाढा लगियो । यो म संग थिएन ।'

श्रीसंतले क्रिकेटबाट टाढा हुँदा केही फिल्ममा अभिनय गरेका थिए । यस्तै एक टेलिभिजन शो बिगबोसमा उपविजेता बनेका थिए ।