एजेन्सी । ईटाली फर्किएका ज्लाटन ईब्राहिमोविच क्वारेन्टाईनमा बस्न सुरु गरेका छन् । सिरि ए क्लब एसी मिलानमा आबद्ध ज्लाटन अभ्यासमा फर्कनु अघि क्वारेन्टाईनमा बसेका हुन् ।
सिरि एको अबरुद्ध सिजन सुरु हुने तयारी भएसंगै खेलाडीहरु ईटाली फर्कन थालेका छन् । अभ्यासमा फर्कनु अघि सबै खेलाडीलाई क्वारेन्टाईनमा बस्न अनिवार्य गरिएको छ ।
कोरोनाले सिरि ए लिग स्थगित भएसंगै उनी स्विडेन फर्किएका थिए ।
स्विडेनमा रहदाँ समेत ज्लाटन प्रशिक्षणमा थिए । उनले गत बर्ष स्विडेनकै एक फुटबल क्लब किनेका थिए । सोही क्लबको टिमसंग ज्लाटनले अभ्यास म्याच समेत खेलेका थिए ।
कोरोनाको महामारीका बीच स्विडेनमा लकडाउन कडा गरिएको छैन ।
हम्मार्बी क्लबको स्वामित्व ज्लाटनले किनेसंगै स्विडेनका प्रशंसकले ३८ बर्षिया खेलाडी एक पटक देशको क्लबका लागि खेल्न सक्ने अपेक्षा गरेका छन् ।
उनी लगानीकर्ताको रुपमा मात्र नभएर करियरको अन्तिम समय प्रशंसकहरु देशको क्लबका लागि खेलेको हेर्न चाहन्छन् । तर उनले यसअघिनै देशको क्लब फुटबल नखेल्ने बताएका थिए ।
क्लबका म्यानेजर जेसपर जानसनले ज्लाटन एक दिन क्लबका लागि खेल्ने सम्भावना रहेको बताउँछन् ।
'ज्लाटनलाई मात्र थाहा छ ।' जानसनले एक अन्तरवार्तामा भनेका छन्, 'उनले केही भनेका छैनन् । उनको आवश्यकताको बारेमा न हामीलाई सोध्न वा उनलाई बताउन आवश्यक छ ।'
मिलान सहितका ईटालीका अधिकांश क्लबले व्यक्तिगत रुपमा गत हप्ताबाट अभ्यास सुरु गरिसकेका छन् । अर्को हप्ताको सोमबारबाट टिमले संयुक्त रुपमा अभ्यास गर्ने तयारी गरेका छन् ।
लिग पुन सुरु गर्ने तयारी भईरहेको समय ज्लाटन ईटाली फर्कने अन्तिम खेलाडी हुन् । उनले आफ्नो भविष्यको बिषयमा कुनै प्रतिक्रिया दिएका छैनन् ।
'मेरो सम्झौता मिलानसंग छ । यो कसरी सकिन्छ, हेर्नेछु ।' उनले स्विडेनको एक मिडियालाई भनेका छन्, 'म आफुले सक्ने जति फुटबल खेल्न चाहन्छु ।'
मिलानसंग ज्लाटनको सम्झौता सिजनको अन्तिमसम्म रहेको छ ।
