एसियन गेम्सको पाँचौ दिन : बन्यो कीर्तिमान, आएन पदक

काठमाडौं । इन्डोनेसियामा जारी १८ औं संस्करणको एसियन गेम्स अन्तर्गत पाँचौ दिन बुधबार पनि नेपालले सम्झन लायक प्रदर्शन गर्न सकेन ।

आधा दर्जन बढी खेलमा प्रतिस्पर्धा गरेपनि नेपाल पदक बिहिन बन्यो । अघिल्ला दिन झैँ नेपाल बुधबार पदकको नजिक पुग्नै सकेन । 

नेपालको लागि भारोत्तोलनको एक राष्ट्रिय कीर्तिमान नै सफलता रह्यो ।  पदकको आशा गरेको प्याराग्लाइडिङ टिम स्पर्धामा नेपालले उच्च प्रदर्शन गर्न सकेन । 

नेपालले आशा गरेको मार्सल आर्ट्स अन्तर्गतको तेक्वान्दोमा आजपनि पदक जित सकेन । तेक्वान्दोका वीरबहादुर महराले दोस्रो चरण यात्रा गरेपनि त्यसभन्दा अघि बढ्न सकिनन् ।

पुरुष कबड्डीमा नेपालले चार खेलमा पहिलो जित हात पारेको छ ।  भलिबलमा नेपालले हार बेहोर्यो । लनटेनिसमा नेपालको चुनौती समाप्त भएको छ । 

नेपाल पदकको प्रतिक्षामा रहदा चीन शीर्ष स्थानमा यथावत रहेका छन् । चीनले ३७ स्वर्णसहित कुल ८१ पदक जितेको छ । दोस्रो स्थान रहेको जापान २० स्वर्णसहित कुल ६७ पदक जितेको छ ।

१० स्वर्णसहित कुल ४६ पदक जितेको दक्षिण कोरिया तेस्रो स्थानमा रहेको छ । भारतले ४ स्वर्णसहित कुल १५ पदक जितेको छ ।

नेपालको दोस्रो दिन कस्तो रह्यो ?

भारोत्तोलनमा नेपालका कमलबहादुर अधिकारीले बुधबार कीर्तिमान रचेका छन् । उनले पुरुष ६९ केजीको स्न्याच, क्लिन एन्ड र कुलमा गरी आफ्नै नाममा रहेको कीर्तिमानमा सुधार गरेका हुन् ।

कमलले स्न्याचमा ११९ केजी र क्लिन एन्ड जर्कमा १६० गरी कुल २७९ केजी भार वहन गर्दै नयाँ राष्ट्रिय कीर्तिमान कायम गरे । स्न्याचमा कमलकै नाममा ११८ केजीको कीर्तिमान थियो जुन उनले २०७१ सालमा ललितपुरमा भएको तेश्रो ग्राँ पिमा बनाएका थिए ।

 

क्लिन एन्ड जर्कमा कमलले बेइजिङ ओलम्पिकमा बनाएको १५५ केजीको कीर्तिमानलाई सुधार गर्ने क्रममा दोश्रो लिफ्टमै १५६ केजी उचालेका थिए । लगातार चौथो एसियाड खेली रहेका कमल तेश्रो लिफ्टमा १६० केजी भार वहन गर्दै पुनः १५६ केजीको कीर्तिमानलाई सुधारे । कमल समग्रमा १४ औं भए । बिहीबार नेपालका विकास थापाले पुरुष ७७ केजीमा प्रतिस्पर्धा गर्नेछन् ।

 

 

महिला थ्री अन थ्री बास्केटबलमा चाइनिज ताइपेईले नेपाललाई १९–८ ले पराजित ग¥यो । नेपालका भावना लामा र अनुषा मल्लले समान ३–३ अंक जोडे । एलिना गुरुङ र श्रेया खड्काले १–१ अंक बटुले ।

नेपाली महिला टोलीले अब शुक्रबार जापान र मंगोलियाको सामना गर्नेछ । त्यसअघि बिहीबार नेपाली पुरुष टोलीले सिरिया र जोर्डन विरुद्ध खेल्नेछ ।

 

पुरुष ६३ केजीमुनि नेपालका वीरबहादुर महरा प्रिक्वाटरफाइनलमै रोकिए । वीर काजाकिस्तानका खेलाडीसंग ३०–१९ ले पराजित भए । त्यसअघि वीरले अफ्गानिस्तानका खेलाडीलाई २४–१३ ले हराउदै प्रिक्वाटरफाइनलमा स्थान सुरक्षित गरेका थिए ।

पुरुष ८० केजीमा नेपालका भुपेन श्रेष्ठ अफ्गानिस्तानका रमेश हुसानीसंग २७–७ ले पछि परे । तेक्वान्दोको अन्तिम दिन बिहीबार नेपालका २ खेलाडीले प्रतिस्पर्धा गर्नेछन् । महिला ४९ केजीमुनि अस्मिता खड्का र पुरुष ६८ केजीमुनि ज्ञानेन्द्र हमालले नेपालको चुनौती प्रस्तुत गर्नेछन् ।

 

 

लनटेनिसमा नेपालको चुनौती समाप्त भएको छ । महिला डबल्समा बुधबार नेपालका मायांका राणा र माहिका राणाको पराजयसंगै नेपालको चुनौती समाप्त भएको हो । पालेम्वाङमा जापानका मोयुका उचिजिमा र इरिका हायासीको जोडीले मायांका र माहिकाको जोडीलाई ६–० र ६–० को सोझो सेटमा पराजित गरे ।

 

पुरुष भलिबलमा नेपालले पराजय भोगेको छ । समूह चरणको आफ्नो पहिलो खेलमा नेपाल चाइनिज ताइपेईंसंग २५–२३, २५–१९ र २५–१५ को सोझो सेटमा पराजित भयो । नेपालले शुक्रबार दक्षिण कोरिया विरुद्ध खेल्नेछ ।

 

महिला छान् छ्वानमा नेपालकी सुस्मिता तामाङ सातौं भइन् । ९ खेलाडी सहभागी उक्त स्पर्धामा सुस्मिताले ९.२५ अंक बटुलिन् । चीन पहिलो, मकाउ दोश्रो र भियतनाम तेश्रो भए । बुधबारको खेलसंगै उसु सम्पन्न भएको छ ।