एजेन्सी । स्पेनिस ला लिगा फुटबलका अध्यक्ष जाभियर टेबासले बार्सिलोनाले फरवार्ड नेयमार र लाउटारो मार्टिनेज अनुबन्धको प्रयास नगरेको बताएका छन् ।
बार्सिलोनाले पछिल्लो समय फान्सेली क्लब पेरिस सेन्ट जर्मेन (पीएसजी) का नेयमार र इटालियन क्लब इन्टरका मार्टिनेज अनुबन्ध गर्न प्रयास गरिरहेको समाचार आइरहेको छ ।
तर, ला लिगा अध्यक्ष टेबासले भने बार्सिलोनाले दुवै खेलाडी अनुबन्धको लागि कुनै प्रयास नगरेको दाबी गरेका छन् ।
'बार्सिलोना दुई खेलाडीको अनुबन्धको प्रक्रियामा रहेको कुरा सत्य होईन्,' टेबासले भनेका छन् ।
टेबासले कोरोना भाईरसको कारण क्लब संकटमा रहेको कारण नेयमार र मार्टिनेज प्राथमिकतामा नरहेको बताए ।
ब्राजिलियन फरवार्ड नेयमार सन् २०१७ मा बार्सिलोनाबाटै पीएसजी गएका थिए । तर, पछिल्लो समय उनी पेरिसमा खुसी नरहेको र बार्सिलोना फर्कन चाहेको बताईएको छ ।
बार्सिलोनाले पनि मेस्सीको स्थान लिन सक्ने खेलाडीको खोजी गरिरहेको छ । त्यसमा नेयमार र मार्टिनेज उपयुक्त हुने बार्सिलोनाको बुझाई रहेको बताईएको छ ।
यस्तै अध्यक्ष टेबासले अहिले क्लबहरु खेलाडी अनुबन्ध भन्दा सिजन सकाउने विषयमा केन्द्रित भएको बताए ।
'उनीहरु सिजन पुन: सुचारु र अन्त्य गर्ने विषयमा केन्द्रित छन् । युरोपेली क्लबको प्राथमिकता खेलाडी स्थानान्तरण छैन,' उनले भने ।
कोरोनाको कारण स्पेनिस ला लिगा अनिश्चितकालका लागि स्थगित गरिएको छ । यस सिजन बार्सिलोना शीर्ष स्थानमा रहेको छ । बार्सिलोना रियल मड्रिड भन्दा २ अंकले अघि रहेको छ ।
-1751975074.jpeg)
