६ वर्षे बालकले डिजाइन गरेको जर्सी प्रयोग गर्दै इटालियन क्लब

एजेन्सी । इटालियन क्लब पेस्काराले आगामी सिजन ६ वर्षे बालकले डिजाइन गरेको जर्सी प्रयोग गर्ने भएको छ ।

इटालीको सिरी 'बी' क्लब पेस्काराले ६ वर्षे बालक लुइगी डी'अगोस्टिनोले पेन्टिङबाट डिजाइन गरेको जर्सी प्रयोग गर्ने भएको हो ।

शीर्ष डिभिजनको लिग खेलिसकेको क्लब पेस्काराले एक पेन्टिङ प्रतियोगिताको आयोजना गर्दै आगामी सिजन प्रयोग हुने जर्सी छनोट गरेको हो ।

कोरोना भाईरसको कारण लकडाउन रहेको अवस्थामा बालबालिकालाई सक्रिय बनाउने योजनासहित क्लबले प्रतियोगिताको आयोजना गरेको हो ।

जसमा लुइगीले सहभागी अन्य प्रतिस्पर्धीलाई पछि पारेका थिए । उनले तयार गरेको जर्सीको अघिल्लो भाग क्लबको मस्कट डल्फिनले फुटबल हान्दै गरेको छ ।

पेस्काराले ७ सिजन शीर्ष डिभिजनको लिग खेलिसकेको इतिहास रहेको छ ।

लकडाउनको कारण इटालीमा मार्चबाट फुटबल गतिविधि अनिश्चितकालका लागि स्थगित गरिएको छ ।

कोरोनाले इटालीमा २४ हजार बढी मानिसको मृत्यु भईसकेको छ । विश्वभर लाखौ मानिसको ज्यान गएको छ ।