एजेन्सी । चेल्सी फरवार्ड ओलिभर जिराउड ईन्टर मिलान जान तयार देखिएका छन् ।
ईटालियन मिडियाका अनुसार जिराउडले ईन्टरसंग व्यक्तिगत शर्तका बिषयमा सहमती नजिक पुगेका छन् । उनी आगामी समर ट्रान्सफरमा लण्डन क्लबबाट ईन्टर मिलानमा पुग्ने निश्चित देखिएको छ ।
चेल्सी प्रशिक्षक फ्रान्क लाम्पार्डको नेतृत्वमा करिब आधा सिजन बिताएका जिराउड आफ्नो भूमिकालाई लिएर निराश छन् । उनी जनवरीमै ईन्टर मिलान जानका लागि ईच्छुक देखिएका थिए ।
लाजियोले समेत विश्वकप विजेता टिमका सदस्यलाई अनुबन्ध गर्न ईच्छा देखाएको थियो । तर अर्को विकल्प नहुँदा चेल्सीले जिराउडलाई बाहिर पठाउन अस्विकार गरेको थियो ।
टामी अब्राहमले चोट बोकेपछि जिराउड चेल्सीका मुख्य फरवार्डको भूमिकामा देखिएका थिए । कोरोनाका कारण सिजन प्रभावित हुनु अघि उनी मुख्य फरवार्डको रुपमा चेल्सीमा थिए ।
चेल्सीले अर्को विकल्प तयार नहुँदासम्म जिराउडलाई क्लबमै राख्न चाहेको थियो । तर ईटालियन मिडियका अनुसार जिराउडले सिरि ए क्लब जाने मन बनाईसकेका छन् ।
रिपोर्टका अनुसार उनले एन्टोनी कोन्टे नेतृत्वको ईन्टरसंग दुई बर्षको सम्झौता गर्ने तयारी गरेका छन् । एक बर्ष थप गर्न सकिने शर्त सम्झौतामा उल्लेख गर्ने तयारी गरिएको थियो ।
आर्सनलका पूर्व फरवार्ड समेत रहेका जिराउडले चेल्सीमा साप्ताहिक १ लाख ३५ हजार पाउण्ड तलब बुझ्दै आएका छन् । रिपोर्टका अनुसार उनले ईन्टरमा साप्ताहिक १ लाख १० हजर पाउण्ड तलब प्राप्त गर्नेछन् ।
जिराउडले यस सिजन चेल्सीबाट मात्र १३ खेल खेल्ने मौका पाए । उनले तीन गोल समेत गरे । जिराउडको विकल्पको रुपमा चेल्सीले जर्मन फरवार्ड लुका वाल्डस्मिटलाई अनुबन्ध गर्ने तयारी गरेको छ ।
-1751975074.jpeg)
