एजेन्सी । इटालीका प्रशिक्षक रोबर्टो मान्चिनीले स्विडेनका भेट्रान फरवार्ड ज्लाटन इब्राहिमोबीच लियोनल मेस्सी र क्रिस्टियानो रोनाल्डोकै स्तर भएको खेलाडी रहेको बताएका छन् ।
स्पोर्ट्स मेडियासेटसँग कुरा गर्दै प्रशिक्षक रोबर्टोले एसी मिलानका फरवार्ड इब्राहिमोबीच मेस्सी र रोनाल्डो जस्तै महान खेलाडी भएको बताएका हुन् ।
'म उसलाई मेस्सी र रोनाल्डोकै स्तरमा राख्छु । उसले लिग उपाधि जितेका छन् । धेरै गोल गरेका छन्,' उनले भने, 'मिलानमा उनले यस सिजन राम्रो गरिरहेका छन् । तर, उनको भविष्यको योजना थाहा छैन ।'
३८ वर्षीय इब्राहिमोबीचले क्लब फुटबलमा ७ सय ९८ खेलमा ४ सय ७८ गोल गरिसकेका छन् ।
'ज्लाटनलाई सर्वकालीन महान फरवार्डको रुपमा सम्झिनेछ,' उनले थपे ।
उनले पेरिस सेन्ट जर्मेन (पीएसजी), आयाक्स, युभेन्ट्स, इन्टर मिलान, बार्सिलोना र म्यानचेस्टर युनाइटेडबाट धेरै उपाधि जितेका छन् । उनले करियरमा ३१ उपाधि जितेका छन् ।
अमेरिकी क्लबबाट मिलान आएका इब्राहिमोबीचले यस सिजन ८ खेलमा ३ गोल गरिसकेका छन् ।
-1751975074.jpeg)
