प्रिमियर लिगका उत्कृष्ट पाँच खेल

एजेन्सी । कोरोना भाईरसको महामारीको कारण इंग्लिस प्रिमियर लिग फुटबलको यस सिजनको खेलहरु स्थगित अवस्थामा रहेको छ ।

विश्वभर महामारीको रुपमा फैलिएको कोरोनाको कारण लिग अप्रिल ३० सम्म स्थगित गरिएको छ । गत मार्च १३ पछि लिगका कुनै पनि खेल भएको छैन ।

यस सिजन लिभरपुल दोस्रो स्थानको म्यानचेस्टर सिटी भन्दा २५ अंकले अघि रहेको छ । र, यस सिजन लिभरपुललाई ऐतिहासिक उपाधि जित्ने अवसर रहेको छ । लिभरपुलको ८२ अंक रहदा सिटीको ५७ अंक रहेको छ ।

कोरोनाले यस सिजन सकिने र नसकिनेमा अझै अन्योलता रहेको छ । तर, सन् २०१९/२० को सिजनमा केहि उत्कृष्ट खेल भएको छ ।

यस सिजन भएको पाँच उत्कृष्ट खेलको चर्चा तल गरिएको छ ।

१. नर्विच सिटी ३-२ म्यानचेस्टर सिटी

म्यानचेस्टर सिटीले सिजनको पहिलो हार नर्विच सिटीको हातबाट व्यहोरेको थियो । नर्विचको मैदानमा भएको खेलमा सिटीले ३-२ को हार व्यहोरेको थियो ।

साविकको विजेता सिटीविरुद्ध नर्विचले निकालेको जित प्रिमियर लिगकै उत्कृष्ट मध्येको एक खेल हो । नर्विचलाई जित दिलाउन टेमु पुकी, केन्नी म्याकलिन र तोड कान्टवेलले एक एक गोल गरेका थिए । सिटीका सर्जियो अग्युरो र रोड्रीले एक एक गोल गरेका थिए ।

यसै सिजन शीर्ष डिभिजनमा उक्लिएको नर्विचले सिटीविरुद्ध उत्कृष्ट खेल पस्किएको थियो । उक्त जित सबैको लागि अप्रत्यासित रहेको थियो । सिटी सन् २०१५ पछि पहिलो पटक शीर्ष डिभिजनमा उक्लिएको क्लबसँग पराजित भएको थियो ।

२. आर्सनल ३-२ एस्टन भिल्ला

आर्सनलले घरेलु मैदानमा एस्टन भिल्लाविरुद्ध निकालेको ३-२ को जित प्रिमियर लिगमा यस सिजनको उत्कृष्ट खेलमा पर्छ ।

गत सेप्टेम्बरमा घरेलु मैदानमा १० खेलाडीमा समेटिएको आर्सनलले पाहुना टोलीविरुद्ध एक गोलले पछि परेको स्थिति समेत उल्टाएको थियो ।

उनाइ इम्रीको नेतृत्वमा रहेको आर्सनलका लागि निकोलस पेपे, पेरिक एम्रिक आबुमियाङ र कलम चाम्बर्सले एक एक गोल गरेका थिए । भिल्लाका जोन म्याकगएँ र वेस्ले मोरेसले एक एक गोल गरेका थिए ।

उक्त खेलमा आर्सनलका मैटल्याण्ड निल्सले दोस्रो हाफको सुरुवातमै रातो कार्ड पाएर मैदानबाट बाहिरिएका थिए ।

३. वुल्भ्स ३-२ म्यानचेस्टर सिटी

गत डिसेम्बरमा वुल्भ्सले सिटीविरुद्ध उत्कृष्ट जित निकालेको थियो । घरेलु मैदानमा भएको खेलमा वुल्भ्सले सिटीलाई ३-२ गोल अन्तरले हराएको थियो ।

१० खेलाडीमा सिमित सिटीका लागि रहिम स्टर्लिङले दुई गोल गरेपनि टोलीलाई जित दिलाउन भने सकेनन् । सिटीका गोलकिपर एण्डरसन १२ औं मिनेटमा रातो कार्ड पाएर मैदानबाट बाहिरिएपछि सिटी दबाबमा आएको थियो ।

वुल्भ्सका लागि एडम ट्राओरे, राउल जेमिनिज र माट दोहेर्टीले गोल गरेका थिए ।

४.वाट्फोर्ड ३-० लिभरपुल

गत फेब्रुवरीमा लिग लिडर लिभरपुलले अप्रत्यासित नतिजाको आत्मसात गर्यो । वाट्फोर्डको हातबाट ३-० को हार लिभरपुलको लागि अप्रत्यासित नतिजासँगै सिजनको पहिलो हार समेत थियो ।

लगातार १८ खेलमा अपराजित रहेको लिभरपुललाई वाट्फोर्डले घरेलु मैदानमा स्तब्ध बनाएको थियो । उक्त खेलमा वाट्फोर्डका स्मालिया सारले दुई गोल गरेका थिए । यस्तै ट्रोय डेनीले एक गोल थपेका थिए ।

पहिलो हाफ गोलरहित बराबरी खेलेको वाट्फोर्डले दोस्रो हाफमा तीन गोल गर्दै अप्रत्यासित नतिजा निकालेको थियो ।

यस सिजन लिभरपुल उपाधि नजिक रहेको छ । तर, कोरोनाको कारण लिग स्थगित गरिएको छ ।

५. सेफिल्ड युनाइटेड ३-३ म्यानचेस्टर युनाइटेड

गत नोभेम्बरमा भएको खेलमा म्यानचेस्टर युनाइटेड र सेफिल्ड युनाइटेडले खेल ३-३ गोलको बराबरी खेलेका थिए । उक्त खेल प्रिमियर लिगको उत्कृष्ट मध्येको एक खेल हो ।

निकै रोमान्चक बनेको खेलमा २-० को अग्रता उल्टाएर युनाइटेडले बराबरी खेलेको थियो । घरेलु मैदानमा सेफिल्डले पहिलो हाफमै १-० को अग्रता बनाएको थियो ।

सेफिल्डका लागि जोन फ्लेक, मोसेट र ओलिभर म्याकब्रुनीले एक एक गोल गरेका थिए । युनाइटेडका ब्राण्डडन विलियम्स, मासोन ग्रिनवुड र मार्कुस राष्फोर्डले एक एक गोल गरेका थिए ।

सुरुवातमा २-० ले अग्रता बनाएपनि अन्तिम समय सेफिल्ड ३-२ ले पछि परेको थियो । तर, ९० औं मिनेटमा ओलिभरले गोल गर्दै खेल ३-३ को बराबरीमा ल्याएका थिए ।