प्रिमियर लिग जुनको पहिलो साता सुरु गर्ने तयारी

एजेन्सी । प्रिमियर लिग सहित ईङ्ल्याण्डको फुटबल जुनको पहिलो साता सुरु गर्ने तयारी गरिएको छ ।

ईङ्लिस फुटबल लिगले जुनको ६ गतेबाट सिजनका बाँकी खेल सूरु गर्ने गरि तयारी अघि बढाएको छ । खेलहरु बन्द रंगशालामा हुने सम्भावना प्रवल छ ।
बेलारुस बाहेक युरोप लगायत विश्वभरका फुटबल प्रतियोगिता कोरोना भाईरसका कारण प्रभावित छन् । धेरै देशले लकडाउनको घोषणा गरेर सार्वजनीक कार्यक्रम गर्न निषेध गरेका छन् ।

कोरोनाका कारण स्पेन र ईटालीको फुटबल अनिश्चितकालका लागि स्थगित भएको छ । जर्मनमा बुन्डेशलिगा सहित दोस्रो डिभिजनको फुटबल क्लबले अभ्यास सुरु गरेका छन् ।

अधिकारीका अनुसार मेको सुरुवातमा बन्द रंगशालामा बुन्डेशलिगाका सिजनका बाँकी खेल सुरु गर्ने तयारी गरिएको छ ।

प्रिमियर लिगका सबै क्लबले शुक्रबार सिजनका बाँकी खेल सञ्चालनका बिषयमा छलफल गरेका छन् । ईङ्लिस अधिकारीका अनुसार प्रिमियर लिग सहित, च्याम्पियनसिप, लिग वान र लिग टूका खेल जुन ६ बाट सुरु गर्ने तयारी गरिएको छ ।

लगत्तै मे १६ बाट छोटो प्रि–सिजनको सुरुवात गर्ने बिषयमा छलफल अघि बढेको छ ।

ईङ्लिस फुटबल लिगको योजना सरकारी सल्लाह र सरकारले लिने लकडाउनको समयमा निर्भर रहनेछ । तर जुनको पहिलो साता बन्द रंगशालामा भएपनि फुटबल फर्काउने ईङ्ल्याण्डको तयारी छ ।