कोरोनाविरुद्धको अभियानमा खेलाडीले कसरी योगदान गर्ने ?

एजेन्सी । कोभिड १९ (कोरोना भाईरस)को संक्रमणबाट विश्व समुदाय आक्रान्त छ । छिमेकी मुलुक चीनबाट सुरु भएको कोरोनाको संक्रमणले विश्वलाई प्रभावित बनाएको छ ।

भाईरसबाट लाखौ संक्रमित बनेका छन्, हजारौले ज्यान गुमाएका छन् । विकास र समृद्धिमा अग्रणी मोर्चामा रहेको अमेरिका, ईटाली, फ्रान्स, स्पेन लगायतका मुलुकलाई कोरोनाले ज्यादा प्रभावित बनाएको छ ।

चीनको वुहानबाट कोरोनाको केन्द्र ईटाली हुँदै अमेरिकामा सरेको छ । तर पछिल्लो संक्रमण दरले छिमेकी देश भारत कोरोनाको ईपिसेन्टर हुने धेरैको अनुमान छ । नेपालसंग खुल्ला सिमा रहेको भारतमा फैलदो कोरोनााले नेपाललाई अझ बढी चिन्तित तुल्याएको छ ।

सरकारले सुरुवातमै मुलुकमा लकडाउनको घोषणा गर्यो । जसले संक्रमणलाई फैलन दिएको छैन । सरकार समेत कोरोना महामारीबिरुद्धको अभियानमा रहेको छ । सिङ्गो राष्ट्र कोरोना महामारीबिरुद्धको लडाँई जित्ने विश्वासका साथ अघि बढेको छ ।

महामारीबिरुद्धको अभियानमा सबै जनताले लकडाउनको पालना गरेर राज्यलाई सहयोग पुर्याएका छन् ।

महामारीबिरुद्धको अभियानमा सरकारले नेपाली खेलकुद क्षेत्रसंग सहयोगको अपेक्षा गरेको छ । अभियानमा सघाउन युवा तथा खेलाडीमा राज्यकाे बिशेष अपिल छ ।

त्यसो भए खेलाडी तथा युवाले कोरोनाबिरुद्धको अभियानमा राज्यलाई कसरी योगदान गर्न सक्छन् त ?

मन्त्रीपरिषद्को चैत २४ गते बसेको बैठकले कोरोनाबिरुद्धको अभियानमा युवा, खेलाडी तथा स्काउटका स्वंयमसेवकलाई परिचालन गर्ने निर्णय गर्दै यसको जिम्मेवारी युवा तथा खेलकुद मन्त्रालयलाई दिएको थियो । महामारीबिरुद्धको अभियानमा राहत वितरण लगायतमा काम युवा तथा खेलाडी परिचालन गर्ने सरकारको मनसाय देखिन्छ ।

सोही अनुसार मन्त्रालयले समेत युवा परिचालनको जिम्मेवारी राष्ट्रिय युवा परिषद्, खेलाडी परिचालनको जिम्मेवारी राष्ट्रिय खेलकुद परिषद् तथा स्काउट परिचालनको जिम्मेवारी नेपाल स्काउटलाई दिने निर्णय गरेको गर्यो ।

मन्त्रालयले आ–आफ्नो वडा, गाउँ, नगर, स्थानीय तह र प्रदेश अन्तर्गतका निकायको स्वीकृत गरेको योजना अनुसार समन्व्य गर्दै सामाजिक दुरी कायम राखेर सावधानीपूर्वक स्वंयम सेवकको रुपमा कोरोनाबिरुद्धको अभियानमा परिचालन हुन आह्वान गरिसकेको छ ।

यस्तै, सरकारले अभियानको दौरान खेलाडी तथा युवाले गर्ने कामको प्रकृती समेत निर्धारण गरेको छ ।

मन्त्रालयबाट निर्धारण गरिएको कामको क्षेत्र अनुसार युवा तथा खेलाडीले विदेशबाट फर्किएका वा सम्भावित संक्रमितको पहिचान गरि सम्बन्धित निकायलाई जानकारी गराउने र क्वारेनटाईनमा बस्न प्रेरित गरी आवश्यक सहयोग उपलब्ध गराउन सक्नेछन् ।

यस्तै, क्वारेनटाईन निर्माण तथा व्यवस्थापनमा युवा तथा खेलाडीले सहयोग गर्न सक्नेछन् । संक्रमणबिरुद्ध जनचेतना बढाउने, सम्भावित संक्रमितलाई स्वास्थ्य परिक्षण गराउन सघाउने, र आवश्यक्ता अनुसार विरामीलाई अस्पतालमा पुर्याउने तथा उपचारमा सहजिकरणको काम युवा तथा खेलाडीले गर्न सक्नेछन् ।

कृषीमा आधारित अर्थतन्त्र भएका कारणले वानीनाली लगाउन र कृषी वाली भित्राउन किशानलाई सहजिकरण गर्ने कार्यक्षेत्र युवा तथा खेलाडीका लागि मन्त्रालयले तोकेको छ ।

ग्रामिण भेगमा उत्पादित कृषी उपज बजारसम्म पुर्याउन सहजिकरण र सहयोग गर्ने तथा गाउँ टोल तथा वडामा पर्याप्त मात्रामा खानेपानीको आपूर्तिको प्रवन्ध तथा खानेपानी लाईन ममर्त संभारमा ध्यान दिदै सम्बन्धित निकायमा पहल गर्ने जिम्मेवारी समेत युवा तथा खेलाडीलाई प्रदान गरिएको छ ।

यस्तै, लक्षित समुदायको तथ्यांक संकलन गर्न र राहत सामाग्री वितरण कार्यमा स्वयंमसेवकको रुपमा सघाउन युवा तथा खेलाडीलाई निर्देशित गरिएको छ ।

समस्यामा परेका व्यक्तिहरुको सुचना संकलन गर्न र निजलाई उद्धार र राहत वितरणमा सम्बन्धित निकायलाई सघाउने तथा आफ्नो क्षेत्रमा रहेको अपांग, बालबालिका, जेष्ठ नागरिक तथा अन्य गरिव असहायहरुको संरक्षण र हेरचाहमा युवा तथा खेलाडीले सहयोग गर्न सक्नेछन् ।

सडक मानवको उद्धार गरि जीवन रक्षामा सघाउने, मानव सेवा आश्रम लगायतका संघ संस्था र अभियान्तालाई सडक मानवको उद्धार गरि संरक्षण गर्न सघाउने कार्यमा लाग्न निर्देशित गरिएको छ ।

आफ्नो क्षेत्रका सही सूचनालाई सम्बन्धित निकायलाई समयमा पुर्याउने र गलत सूचना, अपवाह तथा भ्रम फैलाउने कार्यलाई निरुत्साहित गरि सही सूचना प्रचार प्रसार गर्ने कार्यमा लाग्न समेत युवा तथा खेलाडीलाई निर्देशित गरिएको छ ।

कोरोनाबिरुद्धको लडाँई सरकारले एक्लै सक्दैन । यसमा सम्पूर्ण राष्ट्रको एकजुट सहयोग आवश्यक छ । अझ देशको वर्तमान र भविष्य मानिने युवा तथा खेलाडीले यस अभियानमा बिशेष सहयोग गर्न सक्छन् ।

राहत वितरणदेखि आ–आफ्नो क्षेत्रमा कोरोनाबिरुद्ध लागु गरिएका योजनामा खेलाडी तथा युवाले भूमिका खेल्न सक्छन् । संकटको यस घडीले राज्यले खेलाडी तथा युवासंग अपेक्षा गरेको छ । के यसकालागि खेलाडी तथा युवा तयार छन् ?