ह्यारी केनलाई महङ्गो मुल्य

एजेन्सी । टोटेनहम हट्सपर ह्यारी केनका लागि महङ्गो मुल्य माग गरेको छन् ।

प्रिमियर लिग क्लब म्यान्चेष्टर युनाईटेडले केन अनुबन्धमा चासो राखिरहेको समय टोटनहमले केनलाई बेच्न तयार देखिएको हो ।

तर लण्डन क्लबले केनका लागि २ सय मिलियन पाउण्डको मुल्य राखेको छ ।

ओल्डट्राफोर्ड क्लबले यस समर ट्रान्सफरमा केनलाई अनुबन्ध गर्न चाहेको छ ।

यदी प्रिमियर लिगको चालू सिजन रद्ध भएको खण्डमा टोटेनहमलाई आर्थिक समस्या थपिन सक्ने बताईएको छ । सोही कारण क्लबका अध्यक्ष ड्यानियल लेवीले २ सय मिलियन पाउण्ड पाएको खण्डमा केनलाई बेच्न तयार रहेको बताएका छन् ।

टोटनहमलाई नयाँ रंगशालामा निर्माण गर्दा लागेको ठुलो रकमको व्यवस्थापन गर्नुपर्नेछ । क्लबले रंगशाला निर्माणको करिब साढे ६ सय मिलियन पाउण्ड अझै ऋण बोकिरहेको छ ।

सिजन रद्ध भएको अवस्थामा प्रशारण अधिकारबाट प्राप्त ठुलो रकम क्लबहरुले फिर्ता गर्नुपर्नेछ ।

क्लबका अध्यक्ष लेवी केनको पछिल्लो अभिब्यक्तीबाट समेत निराश छन् । केनले उपाधि विहिन रहने अवस्थामा क्लब छाड्न सक्ने बताएका थिए ।

त्यसैले टोटेनहमले विश्व कीर्तिमानी मुल्य पाएको अवस्थामा ईङ्ल्याण्डका फरवार्डलाई बेच्न तयार रहेको बताएको हो ।

यसअघि फ्रान्सेली क्लब पेरिस सेन्ट जर्मेन (पीएसजी)ले कीर्तिमानी १ सय ९८ मिलियन पाउण्डमा नेयमारलाई बार्सिलोनाबाट अनुबन्ध गरेको थियो ।