थिएरी हेनरीलाई बर्खास्त गर्नु अनुचित

एजेन्सी । मोनाकोका पूर्व मिडफिल्डर रोनी लोपेजले क्लबले पूर्व प्रशिक्षक थिएरी हेनरीलाई छोटो समयमा बर्खास्त गर्नु अनुचित भएको बताएका छन् ।

फ्रेन्च क्लब मोनाकोले सन् २०१८/१९ को सिजन मुख्य प्रशिक्षक हेनरीलाई तीन महिनामै बर्खास्त गरेको थियो । तर, यसै सिजन स्पेनिस क्लब गएका लोपेजले त्यससमय प्रशिक्षक बर्खास्त गर्नु क्लबको गल्ति भएको बताए ।

पोर्चुगिज मिडफिल्डर लोपेज त्यस सिजन खेलाडी घाइते भएको कारण क्लबले खराब प्रदर्शन गरेको समेत बताए ।

'त्यस समय हेनरीका लागि कठिन यात्रा थियो । किनकि त्यस सिजन १७ खेलाडीले चोट बोकेका थिए,' उनले द एथ्लेटिकलाई भने, 'हामीले पाँच स्ट्राइकरसहित च्याम्पियन्स लिग खेलेका थियौं । हेनरीलाई के भईरहेको थियो मानिसलाई थाहा थिएन । मेरो विचारमा क्लबले उनलाई आवश्यक समय दिएँन । त्यो अवस्था मैले जीवनमा देखेको थिएन ।'

हेनरी प्रशिक्षक चुनिएपछि क्लबले खेलेको सुरुवाती ९ खेलमा १ खेल मात्र जितेको थियो । त्यसपछि १२ खेलमा २ जित निकाल्दा हेनरी बर्खास्तमा परेका थिए ।

मोनाको आउनु अघि हेनरीले बेल्जियमको सहायक प्रशिक्षक भएर काम गरेका थिए । रुस विश्वकपमा बेल्जियमले उत्कृष्ट प्रदर्शन गर्दा फ्रान्सेली लिजेण्ड हेनरीले सहायक प्रशिक्षक रहेका थिए ।

सन् १९९७ मा मोनाकोलाई लिग वान जिताउन हेनरीले महत्वपूर्ण भूमिका खेलेका थिए ।