एजेन्सी । ब्राजिलका पूर्व मिडफिल्डर जिकोले पेरिस सेन्ट जर्मेन (पीएसजी) का फरवार्ड नेयमारले फुटबलको व्यावसायिकताबारे क्रिस्टियानो रोनाल्डो र लियोनल मेस्सीबाट सिक्नु पर्ने बताएका छन् ।
ब्राजिलियन फरवार्ड नेयमार प्रतिभावान खेलाडी भएको तर आफ्नै कारण रोनाल्डो र मेस्सीको स्तरमा पुग्न नसकेको जिकोको भनाई छ ।
'मलाई नेयमार वास्तवमै मनपर्छ । उसको खेल्ने तरिका अविश्वसनीय छ। तर, फुटबलको लागि उनी रोनाल्डो र मेस्सी जस्तो व्यावसायिक हुनुपर्दछ,' जिकोले ला गजेटा डेल्लो स्पोर्ट्सलाई भने।
नेयमार सन् २०१७ मा कीर्तिमानी मूल्यमा बार्सिलोनाबाट पीएसजी पुगेका थिए । पछिल्लो समय नेयमार पुन: बार्सिलोना फर्कने चर्चा चलेको छ ।
जिकोले नेयमारले क्लब परिवर्तन गरिरहने बानीले मेस्सी र रोनाल्डोको स्तरमा पुग्न नसकेको दाबी गरे । उनले नेयमारसँग आफुले व्यावसायिक हुन सल्लाह दिएको समेत बताए ।
'नेयमारसँग धेरै विचारहरू छन् जसले उसलाई विचलित गर्दछ। मैले हालै उहाँसँग कुरा गरे र उसलाई अझ बढी पेशेवर हुन आग्रह गरे,' उनले भने, 'नेयमार अहिले २८ वर्षका भए । पीएसजी राम्रो टिम छ । उनीहरूले च्याम्पियन्स लिग जित्न सक्छन् ।'
गत सिजन चोटबाट गुज्रिएका नेयमारले पीएसजीका लागि हालसम्म ८० खेलमा ६९ गोल गरिसकेका छन् ।
