मेस्सी इतिहासकै सर्वोकृष्ट खेलाडी - जाभी

एजेन्सी । बार्सिलोनाका लिजेण्ड मिडफिल्डर जाभी हर्नान्डेजले लियोनल मेस्सी इतिहासकै सर्वोकृष्ट खेलाडी भएको बताएका छन् ।

ग्लोब इस्पोर्ट्ससँग कुरा गर्दै जाभीले रोनाल्डिन्हो र क्रिस्टियानो रोनाल्डो उत्कृष्ट खेलाडी भएपनि मेस्सी सर्वोकृष्ट भएको बताए ।

६ पटकको बालोन डी'ओर विजेता मेस्सीको एकनासको प्रदर्शनको कारण उत्कृष्ट भएको जाभीले बताए ।

'रोनाल्डिन्हो उत्कृष्ट खेलाडी हुन् तर उनमा स्थिरताको अभाव थियो,' जाभीले भने, 'मेरो लागि रोनाल्डिन्हो भन्दा मेस्सी माथि छन् । किनकी उनको स्थिरता केहि वर्षयता उस्तै छ ।'

स्पेनिस पूर्व मिडफिल्डर जाभीले बार्सिलोनामा मेस्सी र रोनाल्डिन्होसँगै खेलेका थिए । उनले रोनाल्डिन्हो र रोनाल्डोमा भएको गुण मेस्सीसँग समेत भएको बताए ।

यस्तै जाभीले आफु प्रशिक्षकको रुपमा बार्सिलोना फर्कन चाहेको समेत बताए ।

'म स्पष्ट छु कि म बार्सिलोना फर्कने चाहान्छु, म धेरै उत्साहित छु,' कतारी क्जालब अल सादका प्रशिक्षक जाभीले भने, 'मैले आफूलाई प्रशिक्षक देखेको छु ।'