एजेन्सी । रिपब्लिक अफ आयरल्याण्डले राष्ट्रिय फुटबल टिमको मुख्य प्रशिक्षकको जिम्मेवारी स्टीफन केनीलाई दिएको छ ।
युरोकप छनोटको नजिक रहेको आयरल्याण्ड टिमले मिक म्याकार्थीलाई स्थानान्तरण गर्दै स्टीफनलाई जिम्मेवारी दिएको हो ।
४८ बर्षका केनी युरोकप लगत्तै मुख्य प्रशिक्षकको जिम्मेवारी पाउने तय थियो ।
तर युरोकप स्थगित हुँदै अर्को बर्ष सरेको र प्लेअफको खेल समेत प्रभावित भएकाले आयरल्याण्डको फुटबल संघले स्टीफनलाई मुख्य प्रशिक्षकको जिम्मेवारी दिएको हो ।
रिपब्लिक अफ आयरल्याण्डले अब स्टीफनको नेतृत्वमा प्लेअफ सहित युरोकप खेल्ने लक्ष्यमा अघि बढ्नेछ ।
सन् २०१८ मा म्याकार्थीलाई दोस्रो पटक राष्ट्रिय टिमको जिम्मेवारी दिईएको थियो । त्यसअघि उनले सन् १९९६ देखि २००२ सम्म आयरल्याण्डको टिमको प्रशिक्षकको रुपमा नेतृत्व गरेका थिए ।
'आयरल्याण्ड फुटबल संघ घोषणा गर्दछ कि म्याकार्थीको उत्तराधिकारीको रुपमा स्टीफन केनी टिमको मुख्य प्रशिक्षकमा नियुक्त गरिएको छ ।' बिज्ञप्तीमा भनिएको छ ।
म्याकार्थीको टिमसंगको सम्झौता जुलाई ३१ मा युरोकपको फाईनलसंगै सकिदै थियो । लगत्तै स्टीफनले यू–२१ सहित राष्ट्रिय टिमको नेतृत्व लिने तय थियो ।
युरोकपको प्लेअफको तयारीका लागि स्टेफनलाई टिमको जिम्मेवारी दिईएको रिपब्लिक अफ आयरल्याण्डले जनाएको छ ।
स्टेफनको नेतृत्वमा टिमले युरो छनोटको सेमिफाईनलको प्लेअफमा स्लोभाकियासंग खेल्दैछ ।
पूर्वनिधारित तालिका अनुसार मार्च २६ मा प्लेअफको मिति तय थियो । तर कोरोना भाईरसको प्रभावका कारण प्रतियोगिता अनिश्चितकालका लागि स्थगित भएको छ ।
