कोरोना त्रास : के गर्दैछन् फुटबल खेलाडी ?
काठमाडौं । चीनको वुहानबाट सुरु भएको कोरोना भाईरस (कोभिड-१९) को कारण अहिले विश्व त्रसित बनेको छ ।
कोरोनाको कारण हजारौं मानिसको ज्यान गएको छ भने लाखौं मानिस संक्रमित भएका छन् ।
विश्वको जनजीवन अस्तव्यस्त बनाउने गरि फैलिएको कोरोनाबाट खेलकुद क्षेत्र अछुतो रहने कुरै भएन ।
युरोपेली राष्ट्रका धेरै खेलाडीलाई कोरोनाको संक्रमण देखिएको छ । जसका कारण विश्वकै चर्चित प्रतियोगिताहरु स्थगित भएको छ ।
विश्व कोरोनाबाट प्रभावित हुँदा नेपाल र नेपाली खेलकुद क्षेत्र समेत प्रभावित भएको छ ।
कोरानाबाट बच्न भन्दै नेपाल सरकारले खेलकुद गतिविधि बन्द गर्नुका साथै अत्यावश्यक बाहेक घरबाट बाहिर ननिस्कन नागरिकलाई आह्वान गरेको छ ।
यस्तै युवा तथा खेलकुद मन्त्रालय र राष्ट्रिय खेलुकद परिषद् (राखेप) ले आफ्ना संघहरुलाई खेलकुद गतिविधि नगर्न र नगराउन निर्देशन दिएका छन् ।
जसका कारण नेपालमा सम्पूर्ण प्रतियोगिता स्थगित भएको छ ।
सरकारको निर्देशनसँगै अखिल नेपाल फुटबल संघ (एन्फा) ले जारी बी डिभिजन लिगसहित राष्ट्रिय टिमको प्रशिक्षण समेत स्थगित गरेको छ ।
कोरोनाको कारण फुटबल गतिविधि ठप्प हुँदा नेपाली फुटबल खेलाडीहरु समेत प्रभावित भएका छन् ।
दैनिक जस्तो मैदानमा देखिने खेलाडीहरु अहिले बन्द कोठामा रहेका छन् ।
नेपाली राष्ट्रिय टोलीका सदस्यसहित अन्य खेलाडीहरु अहिले परिवारसँग रहेका छन् । उपत्यका भित्र रहेका खेलाडीहरु समेत घर जान थालेका छन् । केहि खेलाडी भने विभागीय जागिरका कारण उपत्यका छोड्न पाएका छैनन् ।
१३ औं दक्षिण एसियाली खेलकुद (साग) का स्वर्णधारी कप्तान सुजल श्रेष्ठ अहिले घर परिवारका साथ विदाई मनाईरहेका छन् ।
मछिन्द्र क्लबसँग आबद्व सुजल हाल ससुराली गाउँ (सुर्खेत) मा रहेका छन् ।
‘अहिले कोरोनाको कारण खेलकुद गतिबिधि ठप्प छ । त्यसैले अहिले परिवारसँग भ्याली बाहिर (सुर्खेत) छु ।’ मिडफिल्डर सुजलले भने ।
अहिले कोरोनाको संक्रमण नेपालमा भित्रिनसकेका कारणनै ससुराली गाउँमा समय दिन भ्याएका छन् ।
‘अरु समय खेलकै कारण समय परिवार इष्ट मित्रलाई समय दिन भ्याईदैन थियो । अहिले समय भएकाले यता ( सुर्खेत) आएको छु ।’ गृहनगर धनकुटा फर्कने तयारी गरेका सुजलले थपे ।
यता, महिला राष्ट्रिय टिमको अवस्था समेत उस्तै छ । कुनै पनि प्रतियोगिता नहुनु र विभागले पनि छुट्टि दिँदा खेलाडी विश्राममा रहेका छन् ।
‘अहिले कोरानाको कारण बाहिर निस्कन सक्ने अवस्था छैन । अफिस पनि विदा छ । त्यसैले विश्राममा छु,’ राष्ट्रिय टोलीका स्ट्राइकर सावित्रा भण्डारी भन्छिन् ।
विभागीय टिम सशत्र प्रहरी बलले आफ्नो खेलाडीलाई १४ दिनको विदा दिएको छ । तर, उनीहरुलाई उपत्यका बाहिर भने नजान आग्रह गरेको छ ।
आपतकालिन अवस्थामा भने विभागले खेलाडीलाई समेत फिल्डमा निकाल्ने सम्भावना रहेको छ ।
‘कोरोनाको हल्ला चलिरहे पनि घर जाने सोच बनाएको छैन । सामान्य अभ्यास सहित काठमाडौंमानै रहन्छु,’ राष्ट्रिय टिम र एपीएफ क्लबको गोलरक्षक एन्जिला तुम्बाप्पो सुब्बाले भनिन् ।
राष्ट्रिय महिला टिमकी कान्छी गोलरक्षक अन्जना राना मगर कोरोनाको संक्रमणबाट बच्न घर जाने तयारीमा छिन् ।
‘शुक्रबारसम्म अभ्यास थियो । अब छुट्टि पनि भएको छ । कोरोनाबाट बच्नलाई भएपनि घर जाने सोच बनाएको छु,’ आर्मी क्लबकी गोलकिपर समेत रहेकी अन्जनाले भनिन् ।
भर्खरै पोखरामा सम्पन्न आहा ! रारा गोल्डकपमा मनाङ मर्स्याङ्दी क्लबलाई छैठौं पटक उपाधि जिताएका अन्जन बिष्ट पनि कोरोनाबाट बच्न गृह जिल्ला हेटौंडा जाने तयारीमा छन् ।
अन्तिम समयमा राष्ट्रिय टिमको प्रशिक्षण र मोफसल पनि स्थगित भएपछि अन्जनले घर जाने तयारी गरेका हुन् ।
‘फुटबलका सबै गतिविधि बन्द छ । अब, शनिबार घर जाने तयारी गरेको छु,’ अन्जनले भने ।
