काठमाडौं । मोफसलको बहुप्रतिष्ठित फुटबल प्रतियोगिता आहा ! रारा गोल्डकप फुटबलको उद्घाटन खेलमा ब्रिगेड ब्वाईज क्लब र सहारा क्लब पोखराबीच प्रतिस्पर्धा हुने भएको छ ।
आयोजक सहारा क्लब पोखराले सार्वजनिक गरेको खेल तालिका अनुसार पहिलो खेलमा 'ए' डिभिजन क्लब ब्रिगेड र आयोजक सहाराबीच खेल हुने भएको हो।
पोखरा रंगशाला हुने उद्घाटन खेल फागुन २२ गते हुनेछ । चैत १ गतेसम्म चल्ने १८ औं संस्करणको प्रतियोगितामा 'ए' डिभिजनका ७ क्लबसहित १० टोलीले प्रतिस्पर्धा गर्ने भएका छन् ।
प्रतियोगितामा 'ए' डिभिजनका साविक विजेता थ्री स्टार र उपविजेता त्रिभुवन आर्मीसहित मनाङ मर्स्याङ्दी क्लब, ब्रिगेड ब्वाईज क्लब, नेपाल पुलिस क्लब, एपीएफ क्लब र संकटा क्लबले खेल्ने छन् ।
यस्तै झापा-११, भारतको गान्टोक सिटी फुटबल क्लब, भारत र आयोजक सहारा क्लब पोखराले प्रतिस्पर्धा गर्ने छन् ।
प्रतियोगिताको विजेताले १० लाख १ हजार प्राप्त गर्दा उपविजेताले ५ लाख १ हजार पाउने छन् । यस संस्करणको पुरस्कार राशीमा वृद्धि गरिएको हो ।
हिमश्री फुड्स प्रा. लि. को उत्पादन आहा तथा रारा तयारी चाउचाउ मुख्य प्रायोजक रहेको प्रतियोगितामा वचत हुन आएको रकम क्लबबाट संचालित सहारा फुटबल एकेडेमीमा खर्च गरिने छ । हाल तेस्रो व्याचको एकेडेमीमा १४ जिल्लाका २४ जना बालकहरु आश्रित छन् ।
प्रतियोगिता हेर्न दर्शकको लागि प्रि-क्वाटरका खेलको १००, क्वाटर फाइनलको १५०, सेमिफाईनल २०० र फाईनल खेलको २५० टिकट दर कायम गरिएकोछ । साथै प्रतियोगिता अवधिभर खेल हेर्न पाउने गरि सिजनल टिकट १ हजार ५०० राखिएको छ ।
टिकट काटेर हेर्न आउने दर्शकलाई प्रायोजक हिमश्री फुड्स प्रा. लिले रारा तयारी चाउचाउ निःशुल्क वितरण गर्नेछ । साथै प्रतियोगिता अवधिभर टिकट काटी अवलोकन गर्ने दर्शकहरु मध्ये १ जना दर्शकलाई सि. जि. ईलेक्ट्रोनिक प्रा. ली. (चौधरी ग्रुप) बाट १ थान एल. जि. टि. भि. प्रदान गरिनेछ ।
खेलतालिका -
