काठमाडौं । चौथो संस्करणको खप्तड गोल्डकप फुटबलको उपाधिका लागि आज (मंगलबार) थ्री स्टार र आयोजक सुदुरपश्चिम-११ बीच प्रतिस्पर्धा हुदैछ ।
प्रतियोगिताको नयाँ च्याम्पियन बन्ने लक्ष्य सहित दुवै टोली फाईनल प्रवेश गरेका छन् । धनगढी रंगशालामा हुने फाईनल खेल दिउँसो ३ बजे सुरु हुनेछ ।
खेलेका बिजेताले प्रतियाेगिताकाे नयाँ च्याम्पियन पाउनेछ ।
‘फाइनल खेल फाइनलनै हुनेछ । दुवै टिमलाई उत्तिकै गार्हो पनि । फाइनल खेल ५०–५० को हो । दुवै टिम युवा खेलाडीले भरिएको छ । जसले मौका बनायो । मेहनत गर्याे उसैले जित्ने हो,' थ्री स्टारका प्रशिक्षक मेघराज केसीले भने, 'हामी हाम्रो तर्फबाट एकदमै मेहनत गर्नेछौं ।’
प्रतियोगिताको दुई खेल खेलेको थ्री स्टारले सतप्रतिशत जित निकालेको छ । दुई खेलमा ३ गोल गरेको उसले कुनै गोल व्यहोरेको छैन ।
थ्री स्टारले सेमिफाइनलमा हिमालयन शेर्पा क्लबलाई १-० गोल अन्तरले पराजित गरेको थियो ।
तर, झापामा भएको सताक्षी गोल्डकपको फाइनलमा मछिन्द्र फुटबल क्लबसँग पराजित थ्री स्टार सुदूरपश्चिम-११ लाई कमजोर आक्ने छैन ।
डिफेन्स लाईनमा बलियो रहेको थ्री स्टारलाई फाइनलमा आफ्नो अग्रपंक्तिले सताउने छ । उसले गोललाईन र डिफेन्समा राम्रो खेल देखाएपनि अट्याकमा भने चुकिरहेको छ । मुख्य फिनिसर नहुँदा फाइनलमा थ्री स्टारले यसैको सामना गर्नुपर्नेछ ।
पहिलो पटक घरेलु दर्शकमाझ फाइनल पुगेर नयाँ इतिहास बनाएको आयोजक सुदूरपश्चिम थ्री स्टारलाई पराजित गर्दै अर्काे इतिहास बनाउने दाउमा रहनेछ । नयाँ इतिहास रच्न आयोजक टिमलाई १२ औं खेलाडीको रुपमा घरेलु समर्थकको राम्रो साथ रहनेछ ।
आयोजक सुदूरपश्चिमका प्रशिक्षक रोहित भण्डारी घरेलु दर्शकमाझ आफ्ना अनुभवी र युवा खेलाडीले नयाँ इतिहास रच्ने बताउँछन् ।
‘फाइनल खेल हामीलाई गार्हो पर्छ । थ्री स्टार राम्रो टिम हो । हाम्रो खेलाडीमा अनुभव छ । मनोबल पनि उच्च छ । घरेलु दर्शको राम्रो साथ रहनेछ,’ प्रशिक्षक भण्डारीले भने, ‘खेलमा जसले गोल गर्याे त्यसैले जित्ने हो । हामी बल पोजिसन भन्दा पनि गोल गर्न खेल्छौं ।’
प्रतियोगितामा २ खेल खेलको आयोजक टिमले ६ गोल गर्दा ३ गोल व्यहोरेको छ । टिमका खेलाडीबीच तालमेल नमिल्दा सुदुरपश्चिमले गोल व्यहोर्दै आएको छ । जसलाई सुधार गरे आयोजक टिमले नयाँ इतिहास राख्ने पक्का छ ।
प्रतियोगितामा सर्वाधिक ४ गोल गरिसकेको आयोजकका बिक्रम सिंह ठकुरी थ्री स्टारविरुद्ध मुख्य हतियार रहनेछन् । सेमिफाइनलमा विभागीय टिम एपीएफलाई २-१ गोल अन्तरले पराजित गर्दा बिक्रमले दुई गोल गरेका थिए ।
प्रतियोगिताको पहिलो संस्करणको विजेता मनाङ मर्स्याङ्दी क्लब हो । यस्तै दोस्रो संस्करणको विजेता आर्मी रहँदा गत वर्ष नेपाल पुलिसले उपाधि हात पारेको थियो ।
सुदुरपश्चिम स्पोर्ट्स क्लबले आयोजना गरेको प्रतियोगिताको विजेताले २१ लाख १ रुपैया पाउनेछ । उपविजेताले १० लाख १ रुपैँया पाउने आयोजकले जनाएको छ ।
यस्तै प्रतियोगिताको सर्वोकृष्ट खेलाडीलाई बेनेली मोटरसाईकल प्रदान गरिनेछ । यस्तै विभिन्न विधाका उत्कृष्ट खेलाडीलाई १५÷१५ हजार प्रदान गरिने छ ।
