अन्तिम समयमा किन रोकियो खेल ?

काठमाडौं । सहिद स्मारक ए डिभिजन लिगमा शनिबार तय भएको तेस्रो खेल प्राविधिक कारणले रोकियो ।

लिगको ७७ औं खेलमा साविकको विजेता मनाङ मस्र्याङ्दी तथा एनआरटी भिड्ने कार्यक्रम थियो ।

शसस्त्र प्रहरी बल एपीएफको हल्चोक मैदानमा दिउँसो ३ बजे खेल तय थियो ।

खेलाडी तयार थिए । दर्शक समेत पुगिसकेका थिए ।

तर आधा घण्टा अघिमात्र अखिल नेपाल फुटबल संघ (एन्फा)ले सूचना जारी गर्दै खेल स्थागित भएको जानकारी गरायो ।

मैदान तयार नभएको भन्दै एन्फाले भोली (आईतबार)का लागि खेल सारेको छ । खेल दिउँसो १ बजे एन्फा मैदानमा हुनेछ ।

मनाङ र एनआरटीका खेलाडी मैदान पुगेर जर्सी परिवर्तन गरिसकेको अवस्थामा खेल रोकिएको जानकारी दिईएको थियो । खेलाडीले जर्सी लगाएर वार्म अपको तयारी गरेका थिए ।

मैदानमा खल्डा खुल्डी देखिदा अन्तिम समयमा हलचोक मैदान खेल्न अयोग्य ठहरिएको हो ।

दुबै क्लबतर्फका अफिसियलले मैदान अयोग्य भएको र नखेल्ने बताएपछि हलचोक मैदानको खेल स्थगित भएको हो ।

तयार भएर मैदान पुगेपनि खेल्न नपाएपछि दुबै प्रशिक्षकले एन्फाको लापरबाहिका कारण खेल्न नपाएको बताए ।

उनीहरुले मैदानको विषय एन्फाले हल्का रुपमा लिएको बताए ।

“खेल खेल्न तयारी भएर मैदानमा गएका थियौं । तर मैदानमा समस्या देखिएपछि खेल सारियो ।” मनाङका प्रशिक्षक धनेश्वर प्रजापतिले भने ।

एनआरटीका प्रशिक्षक राजुकाजी शाक्यले एपीएफको मैदानमा खेल्दा खेलाडीमा चोटको समस्या धेरै हुने बताए । उनले मैदानको बिषयमा एन्फालाई गम्भिर भईदिन आग्रह गर्छन् ।

“मैदानको अवस्था ठिक भएन, त्यसैले खेल रोक्नु पर्याे । स्तरीय खेल भन्ने तर मैदान भएन । मैदान कडा छ । खेलाडीलाई चोट लाग्ने सम्भावना धेरै हुन्छ ।” उनी भन्छन् ।

एन्फा भने शुक्रबारसम्म राम्रो अवस्थामा रहेको मैदानमा एपीएफले बिहान कार्यक्रम गर्दा मैदानमा समस्या आएको बताउँछ ।

“शुक्रबार सम्म मैदानको अवस्था ठिक थियो । एपीएफले विहान कार्यक्रम गरेको रहेछ । त्यसैले मैदानको अवस्था विग्रन पुग्यो ।” लिग निर्देशक संजिब मिश्र भन्छन् ।

शुक्रबार एपीएफले मैदानका कुनै कार्यक्रम नगर्ने एन्फालाई बताएपनि शनिबार विहान भने कार्यक्रम गरिदिँदा समास्या आएको मिश्रले प्रष्टिकरण दिए ।

खेल हुने समय अगाडीनै आयोजकको टिम खेल स्थलमा गएर अवस्था नबुझ्दा समस्या आएको हो ।

एन्फाले नवौ चरणसम्म दशरथ रंगशाला र एन्फा मैदानमा खेलाउँदै आएको थियो ।

फिफा विश्वकप छनोट खेलका लागि दशरथ रंगशालामा दुबो उमार्ने काम सुरु भएको छ ।

सोही कारण एन्फा कम्प्लेक्ससंगै हल्चोक मैदानमा खेल खेलाउने तयारी थियो ।

तर पहिलो खेलनै स्थगित भएपछि एन्फाले हल्चोक मैदानमा खेल नखेलाउने निर्णय गरेको छ ।

योसँगै लिगमा बाँकी खेल एन्फा कम्प्लेक्स सातदोबाटोमै हुनेछ ।

एन्फाले शनिबारनै तालिका परिर्वतन गर्दै बाँकी खेल एन्फा कम्प्लेक्समै हुने जानकारी गराएको छ ।

मछिन्द्र र आर्मीबीचको अन्तिम खेल भने दशरथ रंगशालामा हुनेछ ।