त्रिकाेणात्मक सिरिज - फितलो तयारी
काठमाडौं । आईसिसी विश्व क्रिकेट लिग २ भनेको विश्वकप छनोटमा सोझै पुग्ने सुनौलो ढोका हो । लिगको पहिलो खेलनै नेपालले घरेलु भूमिमा खेल्दैछ ।
नेपालले सिरिज अन्तर्गत ओमान र अमेरिकालाई काठमाडौंस्थित त्रिवि क्रिकेट मैदानमा आतिथ्यता प्रदान गर्न लागेको छ ।
सिरिजका सुरुवाती खेल घरेलु मैदानमा खेल्दै शीर्ष स्थानमा उक्लिने अवसर नेपाललाई छ । सिरिजको सूरुको ८ अंक प्राप्तीका लागि नेपाली टिम अभ्यासरत छ ।
नेपाल क्रिकेट संघ (क्यान) निलम्बन पछिको पहिलो आईसीसीको प्रतियोगिता भब्य र सभ्य बनाउन चाहन्छ । त्यसका लागि क्यानका पदाधिकारी हरेक दिन त्रिवि मैदानमा स्तरोन्नती गर्न लागि परेका छन् ।
सिरिज एकदिवसीय अन्तराष्ट्रिय अन्तर्गतको हुने भएकाले आईसीसीको मापदण्डको अनुसार मैदान हुन जरुरी छ । सोही मापदण्डको मैदान बनाउने काममा ब्यस्त छन्, हाल क्यानका पदाधिकारी ।
करिब चार बर्षको निलम्बनलाई सशर्त फुकुवा गरेको आईसीसीलाई क्यानले आफुप्रति विश्वास बढाउन निकै कसरत गरेको देखिन्छ ।
सिरिजको लागि तीन वटा पिच निर्माण गरिएको छ ।
पिचको निरिक्षणको लागि क्यानले श्रीलंकाका पुर्व खेलाडी तथा पिच विशेषज्ञ बन्दुला वार्नापुरालाई जिम्मेवारी दिएको छ ।
हाल त्रिवि मैदानमा एकदिवसीय स्तरको खेलका लागि पिच निर्माणको कार्य सकिएको छ । अब पिच रोलिङ र पानि हाल्ने काम मात्र बाँकी छ ।
मैदानमा आउट फिल्ड, पानीको व्यवस्था, भीआईपी व्यवस्थापन, सुरक्षा, नेट अभ्यास, व्यवस्थित चमेनागृह, बाथरुम लगायतका काम अन्तिम चरणमा पुगेको छ । क्यानले अभ्यास गर्नका लागि मुलपानीमा समेत पिच निर्माण गरेको छ ।
सिरिजसंगै नेपालको त्रिवि क्रिकेट मैदानले एकदिवसीय मान्यता पाउनेछ । सोही ऐतिहासिक दिनको प्रतिक्षामा खेलाडी समेत छन् ।
खेलाडीहरु घरेलु मैदानमा आफ्ना समर्थक समक्ष एकदिवसीय क्रिकेट खेल्न आतुर देखिएका छन् ।
तर नेपालको तयारीमा भने केही प्रश्न छन् ।
के यही तयारीले पुग्छ त ?
राष्ट्रिय टिमले राम्रो तयारी बिनै सिरिजमा लक्ष्य पुरा गर्न सक्छ त ?
ओमान र अमेरिका दुवै बलिया टिम हुन् ।
कुनै बेला नेपालले दुवै टिमलाई सहजै पराजित गर्दथ्यो । तर अब समय बदलिएको छ ।
ओमानलाई नेपालले पराजित गर्न नसकेको ७ वर्ष भएको छ । अमेरिका विश्व क्रिकेटमा दिनप्रति दिन फड्को मार्दै आएको छ ।
सिरिज अघि नेपालले चार हप्ता अभ्यास गर्ने कार्य तालिका बन्यो । सिरिज आउन एक हप्ता बाँकी छ । अभ्यास खेलको रुपमा नेपालले क्यान–११ को नामबाट मलेसियाको टिमसंग पोखरामा ५० ओभरको ३ खेल खेल्यो । तीनै वटा खेलमा नेपालले सहज जित निकाल्यो ।
सुनसरीको इनरुवामा सम्पन्न एमएम कप क्रिकेट खेल्न आएको मलेसियासंग क्यानले अभ्यास खेल्ने बाताबरण मिलाएको हो । तर नेपालको लागि मलेसिया टिम निकै तल्लो स्तरको टोली हो ।
त्रिकोणात्मक सिरिजमा नेपालले सोचे अनुरुप नतिजा निकाल्ने हो भने आफु भन्दा माथिल्लो स्तरको टिमसंग प्रतिस्पर्धात्मक खेल खेल्न जरुरी छ ।
आईसीसीलाई खुसी बनाउन मैदानमा मात्र नभएर खेलको नतिजा समेत राम्रो ल्याउन जरुरी छ ।
तर क्यानको ध्यान मैदानमा मात्र देखिन्छ ।
’क्यानले मैदान बनाउन लागि परेको छ । हामी खेलाडी आफै तयार हुँदैछौं ।’ राष्ट्रिय टिमका उप कप्तान दिपेन्द्र सिंह ऐरी भन्छन्, ’क्यानले आफ्नो ठाउँबाट गरेको छ । हामी आफै मेहनत गर्दै छौं ।’
’बलियो टिमसंग सिरिज खेलेको भए केही फरक त हुने थियो । तर घरेलु विकेटको अवस्था थाहा हुने कारण त्यसको फाइदा उठाउने कोशिस गर्नेछौं ।’ दिपेन्द्रले थपे ।
नेपालको मैदान र मौषमसंग मिल्दो जुल्दो हुने भारतको मुम्बईमा अमेरिकाले अभ्यास गर्दैछ । उसले त्यहाँ मुम्बई क्रिकेट संघसंग ३ वटा ५० ओभरको खेल खेल्ने छ । अनि नेपाल आउने छ ।
नेपालले सिरिज अघि प्रतिस्पर्धात्मक खेल खेल्न नपाएको क्यान अध्यक्ष चतुर बहादुर चन्द स्वीकार गर्छन् । ’सिरिज अघि बाहिर (अन्तराष्ट्रिय) गएर राम्रो टिमसंग खेलेर आउनु पर्ने थियो तर सकिएन ।’ अध्यक्ष चन्दले भने, ’नेपालमा टिम बोलाएर खेल्न मैदान नै उपलब्ध भएन । त्यसैले चाहेर पनि केहि गर्न सकेनौं ।’
’साग सकिएपछि खेलाडी पीपीएल र एमएम कपमा ब्यस्त भए । आईसीसीसंग स्वीकृति लिएको प्रतियोगिता बिथोल्न पनि मिलेन । खेलाडी त अझ समयमै क्याम्पमा आउन सकेका थिएनन् ।’ उनले थपे, ’एमएम कपबाट खेलाडी क्याम्पको लागि बोलाउँदा क्लब रिसाए । यस्तोमा अब घरेलु मैदान र दर्शकको फाइदा लिंदै सिरिजमा राम्रो गर्ने लक्ष्य लिएका छौं ।’
प्रतिस्पर्धात्मक नभए पनि अभ्यासका लागि मलेसियासंग खेल्ने वातावरण मिलाएको उनले बताए ।
घरेलु मैदानमा खेल्नु कुनै पनि खेलाडीको लागि उत्साहको कुरा हो । त्यसमा ऐतिहासिक एकदिवसीय खेल पहिलो पटक घरेलु मैदानमा हुदैछ ।
घरेलु मैदानमा एकदिवसीय सिरीज जित्दै ईतिहास रच्ने समयमा खेलाडीले प्रतिस्पर्धात्मक अभ्यास खेल खेल्न नपाएको गुनासो गरेका छन् ।
तथ्यांक हेर्दा दुवै टिम (अमेरिका र ओमान) माथि हाबी देखिएको नेपालको लागि वर्तमान अवस्था भने अनुकुल छैन । दुवै टिममा अप्रवासी खेलाडीको बाहुल्यता छ ।
नेपाली खेलाडीले ५० ओभरको खेल नियमित खेल्न पाएका छैनन् । घरेलु मैदान र दर्शकको साथ भएपनि एकदिवसीय खेलको अभाव सिरिजमा देखिन सक्नेछ ।
