अरहान्त र अमृत सेमिफाइनलमा

काठमाडौं । साबिकको विजेता अरहान्तकेशर सिम्ह र अमृत थापा मगर तेस्रो धनलक्ष्मी महर्जन स्मृति राष्ट्रिय स्क्वास प्रतियोगिताको पुरुष सिंगल्समा सेमिफाइनलमा प्रवेश गरेका छन् 

 

बिहीबार भएको क्वाटरफाइनलमा अरहान्तले राकेश गुप्ता र अमृतले सुगम तुल्सानलाई पराजित गरे ।  उनीहरुसंगै राजेन्द्र शाक्य र प्रवीणवीरसिंह कंशाकार पनि सेमिफाइनलमा प्रवेश गरेका छन् । राजेन्द्रले ज्ञानु चौधरी तथा प्रवीणले दिलिप अधिकारीलाई समान ३–० को सोझो सेटमा पराजित गरे ।

महिला सिंगल्समा साविकको विजेता भावना सुनुवारले स्वस्थानी श्रेष्ठलाई ३–० तथा कृष्णा थापाले विपना ब्लोनलाई ३–० को सीधा सेटमा हराउदै फाइनलमा स्थान सुरक्षित गरे ।

यु–१५ ब्वाइज सिंगल्समा विकास मगरले रोहन नेपाली र सलिन थापा मगरले राजेश परियारलाई समान २–० ले पाखा लगाउदै उपाधि भिडन्त पक्का गरे ।

सोही स्पर्धाको गल्र्समा सपना ब्लोनले आयुशा श्रेष्ठ तथा मुस्कान राउतले श्रीमाया लामाको चुनौती समाप्त पार्दै फाइनलमा स्थान पक्का गरे । सपना र मुस्कान दुवैले प्रतिद्वन्द्वीलाई २–० ले निराश पारे ।

 

मास्टर्स ५० वर्षमाथि सिंगल्समा दिलिप अधिकारीले अनिल वज्राचार्यलाई ३–२, सुरेश गुरुङले किशोर महर्जनलाई ३–० तथा इन्द्रबहादुर कार्कीले मनोजबहादुर श्रेष्ठलाई ३–० को सेटमा पन्छ्याउदै सेमिफाइनल यात्रा तय गरे । सुदीपबहादुर सिंहले प्रेम सिंहबाट वाक ओभर पाउदै सेमिफाइनलमा स्थान बनाए ।

 

पाँच दिने प्रतियोगितामा पुरुषतर्फको बिजेताले १८ हजार, उपबिजेताले १० हजार र तेस्रो र चौथो हुनेले ४ - ४ हजार पाउने छन् । महिलातर्फ बिजेताले ११ हजार, उपबिजेताले ६ र तेस्रो र चौथोले समान ३ - ३ हजार पाउने छन् । यस्तै उमेर समूहका बिजेताले पनि नगद पुरस्कार पाउने छन् ।