धनगढी । नेप्स कफी संस्कार कप टी-ट्वान्टी खुला क्रिकेट प्रतियोगिता धनगढीमा हुने भएको छ।
आयोजक संस्कार क्रिकेट एकेडेमीको आयोजनामा हुने प्रतियोगिता बैशाख अन्तिम सातादेखि हुने भएको हो ।
धनगढीमै विद्यालय स्तरीय क्रिकेट प्रतियोगिता लिटल फ्लावर प्रिमियर लिग गर्दै आएको एकेडेमीले प्रतियोगिताका लागि टिम दर्ता समेत सुरु भईसकेको जनाएको छ ।
‘टिम दर्ताका लागि स्कुल, कलेज, क्रिकेट एकेडेमी तथा कम्पनीहरुलाई अनुरोध गरेका छौँ,’ आयोजक संस्कार क्रिकेट एकेडेमीका अध्यक्ष रामचन्द्र शाहीले भने, ‘टिम दर्ताको मिति माघ ११ गते सम्म मात्रै रहेको छ।’
प्रतियोगिताको पुरस्कार राशि र अन्य विस्तृत जानकारी भने पत्रकार सम्मेलन मार्फत दिईने उनले बताए ।
संस्कार क्रिकेट एकेडेमीका प्रवन्ध निर्देशक कलेन्द्र शाहीले संस्कार कपले लुकेर रहेका खेलाडीहरुलाई अवसर प्रदान गर्ने बताए ।
एकेडेमीका निर्देशक भुपिसिंह धामीका अनुसार नेप्स कफी मुख्य प्रायोजक रहेको प्रतियोगितामा जोशी अप्टिकल तथा आइ केयर सेन्टर धनगढी, इमेज होटेल धनगढी र समाजसेवी जयन्ती थापाले पनि सहयोग गर्ने प्रतिवद्धता जनाएका छन् ।
