रंगशाला निर्माणमा क्रिकेट समर्थकको सहयोग

चितवन । धुर्मुस सुन्तली फाउन्डेसनद्वारा चितवनमा निर्माणाधीन गौतमबुद्ध अन्तराष्ट्रिय क्रिकेट रंगशाला निमार्णका लागि नेपाल क्रिकेट समर्थक समाज (एनसीएसएस) चितवनले १ लाख ५० हजार रुपैयाँ सहयोग गरेको छ ।

एनसीएसएस चितवनले रंगशाला परिसरमा आज (शनिबार) फाउन्डेसनको टिमसँग मैत्रीपूर्ण खेल खेल्दै सहयोग रकम हस्तान्तरण गरेको हो ।

एनसीएसएस चितवनले फाउन्डेसनका अध्यक्ष सिताराम कट्टेललाई सहयोग रकम हस्तान्तरण गरेको थियो ।

एनसीएसएस चितवनले आफ्ना सदस्य, हिट एण्ड वीन क्याम्पियन, अन्य विभिन्न व्यक्ति तथा संस्थासंग रकम संकलन गरेर सहयोग हस्तान्तरण गरेको हो ।

सहयोग रकम हस्तान्तरण अघि एनसीएसएस चितवन र फाउन्डेसन ११ बीच मैत्रीपूर्ण क्रिकेट भएको थियो ।

सो खेलमा एनसीएसएस २० रन ले विजयी भएको थियो ।

फाउन्डेशनका अध्यक्ष कट्टेलले सहयोगका लागि एनसीएसएस चितवन टिमलाई धन्यवाद दिए ।

उनले भने, ’अभियानमा सबैको सहयोग रहोस् । क्रिकेटको कारण नेपाललाई संसारले चिनोस् ।’

‘सहयोगी दाता नै हाम्रो शक्ति हो । जे छ त्यसलाई सहयोगको भावना जगाइदिनु होस् ।’ उनले थपे ।

एनसीएसएस चितवनले रंगशाला निर्माण कार्य सम्पन्न नभएसम्म सक्दो सहयोग गर्ने बाचा गरेको थियो ।