सन्दीपको निम्तोमा जम्पा भन्छन् - 'नेपाल जान इच्छुक छु'

काठमाडौं । अष्ट्रेलियन स्पिनर एडम जम्पाले नेपालमा क्रिकेट खेल्न आउन आफु इच्छुक रहेको बताएका छन् ।

नेपाली लेग स्पिनर सन्दीप लामिछानेले नेपालमा खेल्न आफुलाई निम्तो दिएको भन्दै जम्पाले नेपाल आउन आफु इच्छुक रहेको बताएका हुन् ।

अष्ट्रेलियामा जारी बिग बास लिग (बीबीएल) मा दुवै स्पिनर मेलबर्न स्टार्सबाट खेल्दै आएका छन् । र, सन्दीपले आफ्ना टिममेट जम्पालाई नेपालमा आउन तथा खेल्न निम्तो दिएका हुन् ।

सन्दीपको निम्तोसँगै जम्पाले पनि नेपाल आउन इच्छा देखाएका हुन् ।

'उ (सन्दीप) मलाई नेपाल आएको हेर्न चाहन्छ । र, उसँग घुम्न मलाई पनि मन पर्छ,'' जम्पाले भने, 'सन्दीपले मलाई नेपालमा हाइकिङ गराउन चाहेका छन् । यस्तै म नेपालमा खेलेको हेर्ने इच्छा समेत व्यक्त गरेका छन् ।'

जम्पाले अष्ट्रेलियामा सन्दीपले टिमका सबै साथीहरुलाई नेपाली रेस्टुरेन्टमा नेपाली परिकार खुवाउन लैजाने गरेको समेत बताए ।

'जब नेपाली रेष्टुरेन्ट भेटिन्छ, सन्दीपले नेपाली परिकार खुवाउन लाने गर्छन्,' जम्पाले थपे, 'ऊ मेरो प्यारो सानो साथी हो र उसँग घुम्न मलाई मन पर्छ ।'

यस्तै जम्पाले सन्दीप युवा र सिक्दै गरेका खेलाडी रहेको बताए ।

'सन्दीप विकेट लिन मन पराउने गर्छन र त्यसमा उनी राम्रो पनि छन्,' जम्पाले भने, 'तर कहिलेकाँही उनी डिफेन्सिभ हुन्छ र डिफेन्सिभ बलिङ सिक्न चाहान्छन् । ऊ वास्तवमै राम्रो केटा र साँच्चिकै राम्रो स्रोता हो ।'

यस सिजन सन्दीपले ५ खेलमा ६ विकेट लिएका छन् ।