काठमाडौं । करातेका पूर्वखेलाडी आरके श्रेष्ठ पहारीले १३ औं दक्षिण एसियाली खेलकुद (साग) मा पदक विजेता खेलाडीलाई नगदसहित सम्मानित गरेका छन् ।
ललितपुरको सानोगाउँस्थित रोयल स्पोर्ट्स एकेडेमीमा शनिबार आयोजित कार्यक्रमबीच तेक्वान्दोतर्फ स्वर्ण विजेता संगीता बस्याल र बास्केटबलका खेलाडीद्वय निकेश मगर र विनोद महर्जन सम्मानित भएका हुन् ।
हाल दक्षिण कोरियामा बसोबास गर्दै आएका पूर्वखेलाडी आरकेले स्वर्ण विजेता संगीता, निकेश र विनोदलाई समान २५ हजार रुपैयाँ नगदसहितले सम्मान गरेका हुन् ।
आरकेका धर्मपत्नी शारदा प्रजापति र आइकेकेएफ कराते संघका उपाध्यक्ष राजीव महर्जनलगायतले खेलाडीलाई दोसल्ला ओढाएर सम्मानित गरेका थिए । प्रजापतिले १३औं सागमा पदक विजेतालाई नगद प्रदान गरेकी थिइन् । सोही अवसरमा निकेशलाई रोयल स्पोर्ट्स एकेडेमीले नगद ८ हजार रुपैयाँसहित सम्मानित गरेको थियो । तेक्वान्दोकी संगीताले फाइटतर्फ ६२ केजीतौलसमूहमा नेपाललाई स्वर्ण पदक दिलाएकी थिइन् ।
निकेशले १३औं सागमा बास्केटबलको थ्री बाई थ्रीमा रजत दिलाएका थिए भने विनोदले फाइभ बाई फाइभमा कांस्य पदक जितेका थिए । आरकेले पूर्वखेलाडी भएकाले देशका लागि सदैव पसिना बगाउने खेलाडीलाई सम्मान गर्न पाउँदा गर्विलो महसुस हुने बताए ।
आरकेले यसअघि विभिन्न अन्तर्राष्ट्रिय प्रतियोगितामा प्रतिस्पर्धा गर्नका लागि नेपाली खेलाडीलाई सम्मान गर्दै पनि आइरहेका छन् ।
