साइक्लिङका स्वर्णधारी बुद्धि सम्मानित

काठमाडौं । गोंगबुस्थित युरो किड्सले १३ औं दक्षिण एसियाली खेलकुद (साग) अन्तर्गत साइक्लिङका स्वर्ण विजेता बुद्धिबहादुर तामाङलाई शनिबार सम्मान गरेको छ ।

युरो किड्सले आफ्नो वार्षिक खेलकुद दिवसका अवसरमा बुद्धिलाई नगदसहित सम्मान गरेको हो ।

बुद्धिले पुरुष क्रस कन्ट्रीको २० किलोमिटर दूरीमा स्वर्ण जितेका थिए । बुद्धिसहित नेपालले विभिन्न स्पर्धामा ४ स्वर्ण जितेको थियो । सागको साइक्लिङमा नेपालले पहिलो पटक स्वर्ण जितेको हो । बुद्धिले १२ औं सागमा पनि सहभागिता जनाएका थिए । त्यस बेला रोड रेसमा सहभागिता जनाएका बुद्धि समग्रमा चौथो भएका थिए ।

युरो किड्सका अध्यक्ष प्रमोद पाण्डे, निर्देशक राजन कार्कीलगायतले बुद्धिलाई प्रशंसा पत्र र नगद १० हजार रुपैयाँ प्रदान गरी सम्मान गरे ।