काठमाडौं । अन्तर जिल्ला क्लब स्तरीय छनोट क्रिकेट प्रतियोगितामा जलेश्वर स्पोर्ट्स क्लबले जित हात पारेको छ ।
जलेश्वर रंगशालामा मंगलबार भएको खेलमा जलेश्वरले धमौरा क्रिकेट एकेडेमीलाई ६ विकेटले पराजित गर्यो ।
धमौराले दिएको १ सय १७ रनको लक्ष्य पछ्याएको जलेश्वरले अन्तिम बलमा ४ विकेट गुमाएर लक्ष्य पुरा गर्यो । उसका विजय याधबले सर्वाधिक ३५ रनको इनिङ्स खेले ।
यस्तै मुरारी ठाकुरले २०, आशिक झाले १५, अनिल कुमार साह ८ तथा गोपाल सिंहले ५ रनको योगदान गरे । धमौराका सरफराज अन्सारी र राजन मण्डलले समान २/२ विकेट हात पारे ।
यसअघि टस जितेर पहिले ब्याटिङ गरेको धमौराले २० ओभरमा ९ विकेट गुमाएर १ सय १६ रन बनायो । उसका प्रविन यधबले २७, सुधिर कुमार मण्डलले २३ तथा सुनिल सुमनले अविजित १५ रन बनाउनु बाहेक अन्य खेलाडीले दोहोरो अंक छुन सकेनन् । जलेश्वरका गोपाल सिंह र शान बाबु शले समान २/२ विकेट हात पारे ।
खेलमा जलेश्वरका आशिक झा म्यान अफ द म्याच घोषित भए ।
