काठमाडौं । बंगलादेशमा जारी एसीसी इमर्जिङ एसिया कप क्रिकेटमा प्रतिस्पर्धा गरेर नेपाली राष्ट्रिय क्रिकेट टिम मंगलबार स्वदेश फर्किएका छन् ।
प्रतियोगिताको समूह चरणबाट बाहिरिएको नेपालले समूह चरणमा एक खेल मात्र जितेको थियो । समूह 'बी' मा नेपालले ३ खेलमा २ अंक जोडेको थियो ।
नेपालले समूह चरणमा हङकङलाई मात्र ४० रनले हराएको थियो । तर, बंगलादेशको यू-२३ टिमसँग ८ र भारतको यू-२३ टिमसँग ७ विकेटले पराजित भएको थियो ।
स्थाई कप्तानीको जिम्मेवारी पाएपछि ज्ञानेन्द्र मल्लको यो पहिलो अन्तराष्ट्रिय प्रतियोगिता थियो । तर, प्रतियोगितामा कप्तान ज्ञानेन्द्रको प्रदर्शन सम्झन लायक रहेन् । उनी ३ खेल खेल्दा २ खेलमा गोल्डेन डक आउट भएका थिए । हङकङविरुद्ध भने उनले २२ रन बनाएका थिए ।
बंगलादेशबाट स्वदेश फर्किएपछि कप्तान मल्लले प्रतियोगितामा नेपालको प्रदर्शनबारे त्रिभुवन अन्तराष्ट्रिय विमानस्थलमा कुराकानी गरेका छन् ।
कप्तान मल्लसँगको कुराकानीको सम्पादित अंश :
बंगलादेश भ्रमण कस्तो रह्यो ?
ठिकै भयो भनौं । सोचेको जस्तो राम्रो गर्न सकिएन । बंगलादेश र भारतसँग अझ राम्रो गर्न सकिन्थ्यो होला ।
हामी के मा चुक्यौं ?
ब्याटिङ हाम्रो राम्रो भएन । भारतविरुद्ध हामी २ सय ३० भन्दा माथि रन बनाउन सक्थ्यौं होला । बंगलादेशविरुद्ध २ सय पनि पुर्याउन सकेनौं । तर, पनि यी दुवै टोली बलिया थिए ।खास गरेर बंगलादेशको टिम नै बलियो थियो । जे भएपनि हामीले प्रतिस्पर्धात्मक खेल प्रस्तुत गर्न सकेनौं ।
उनीहरु बलियो कि हामी कमजोर ?
यो लेभलमा आइसकेपछि घरिघरि कम्ब्याक गर्ने मौका पाउदैनौं । उनीहरुलाई एउटा मुमेण्टम पाइसकेपछि त्यसलाई कसरी ह्याण्डल गर्ने भन्ने हामीलाई भन्दा राम्रोसँग ज्ञान छ , अनुभव छ ।
हामीले यस प्रतियोगितामा यस्तो विकेटमा कसरी खेल्ने, सिंगल डबलको लागि कसरी खेल्ने भन्ने कुरा सिक्न पाएका छौं । उनीहरु हामी भन्दा धेरै माथि छन् र हामीले अझै धेरै मेहनत गर्नु पर्छ भन्ने देखियो ।
आगामी खेलका लागि अब हामीले के गर्नु पर्छ ?
संधैं भनिरहेको जस्तो म्याच एक्सपोजर चाहिन्छ । ठुलो टिम जस्तै बंगलादेश, भारतको सिनियर होस् या यू-२३ टिमसँग राम्रो विकेटमा खेल्दै जाने हाम्रो बिग्रिएको भनेको ब्याटिङ राम्रो हुँदै जान्छ ।
औपचारिक कप्तानको रुपमा पहिलो वैदेशिक भ्रमण कस्तो रह्यो ?
व्यक्तिगत प्रदर्शन राम्रो भएन । ब्याड लक, जे हुनु भयो । अझ अगाडी महत्वपूर्ण खेलहरु आइरहेको छ । यो बाहेक मैदानमा टिमले धेरै सहयोग गर्यो, राम्रो गरे त्यसैले खुसी नै छु ।
कप्तानीको दबाबले व्यक्तिगत प्रदर्शनमा प्रभाब पारेको हो कि ?
मलाई कप्तानीको दबाब भन्ने कहिल्यै लागेन । ब्याड लक भनौं , सुरुवात मै आउट हुन पुगे, राम्रो गर्न सकिन ।
अनुभवी पारस र सन्दीपको अभाव खड्कियो कि नाइ ?
मैदान जानु अघि नै प्लेइङ-११ थाहा हुन्छ । त्यस्तो बेला कसैको अभाव खोज्ने हो भने कहिले विराट कोहली आवश्यक पर्ला कहिले कुनै खेलाडीको । त्यसैले हामी जहिले हाम्रो बेस्ट-११ यहि हो भनेर खेल्ने हो त्यसैले त्यस्तो महसुस भएन ।
लामो समयपछि क्यानको अगुवाइमा वैदेशिक भ्रमण गर्नु भयो । कस्तो व्यवस्थापन थियो त ?
त्यस्तो फरक केहि भएन । म्यानेजर राम्रो हुनु हुन्थ्यो । हामी क्यानको बारे कुरा गर्न आएको हैन, तपाइँहरु खेलमा मात्र ध्यान दिनु भन्नु हुन्थ्यो र खेल्ने सकारात्मक बाताबरण बनाइदिनु हुन्थ्यो त्यसको लागि धन्यबाद भन्न चाहान्छौं । उहाँहरुले सबै काम आफैले गर्न पाउनु भएको छैन । सुरु देखि आफ्नो काम गर्दै हुनुहुन्छ । आशा छ आउने दिनमा अझ राम्रो हुन्छ ।
सागको लागि लक्ष्य के छ ?
अवश्य पनि सागको लागि स्वर्णका लागि खेल्ने हो, हेरौं कहाँ सम्म पुगिन्छ ।
-1751205100.jpg)
