साग खेल्ने स्क्वासका ४ खेलाडीलाई डेंगु !

काठमाडौं । नेपालमा आयोजना हुने १३ औं दक्षिण एसियाली खेलकुद (साग) मा सहभागि हुने स्क्वासका ४ खेलाडी र एक प्रशिक्षकलाई डेंगुको संक्रमण देखिएको छ ।

सागको अन्तिम तयारीमा रहेका स्क्वासका ४ खेलाडीसहित एक प्रशिक्षकलाई डेंगुको संक्रमण देखिएको हो ।

सागका लागि छनोट भएका दिपक थापा, अमीर ब्लोन, कृष्णा थापा र स्वस्थानी श्रेष्ठलाई डेंगुको संक्रमण देखिएको हो । यस्तै प्रशिक्षक हिरा बहादुर थापालाई पनि डेंगुको संक्रमण देखिएको छ ।

साग खेल्ने कुल ६ खेलाडी मध्ये ४ जनालाई डेंगुको संक्रमण भएपछि प्रशिक्षण प्रभावित भएको छ ।

'हाम्रा ४ खेलाडीलाई डेंगु भएको छ । म आफू पनि डेंगुबाट ग्रसित छु । त्यही कारण प्रशिक्षण प्रभावित भएको छ,' प्रशिक्षक थापाले खेलपाटीसँग भने ।

खेलाडी र प्रशिक्षकलाई वैदेशिक प्रशिक्षणका लागि भारत जाँदा डेंगु भएको हो । सागको विशेष तयारीका लागि स्क्वास टिम भारतको कोलकत्ता गएको थियो ।

कोलकत्तामा रहँदा ४ खेलाडीसहित प्रशिक्षकलाई लगातार ज्वरो आएपछि परिक्षणको क्रममा डेंगु पुष्टि भएको प्रशिक्षक थापाले बताए ।

डेंगुको संक्रमणपछि स्क्वास टोलीले कोलकत्तामा एक साता आराम गरेको थियो ।

'कलकत्तामा ६ दिन खेलाडीसहित म पनि अस्पतालमा भर्ना हुनुपर्यो,' प्रशिक्षक थापाले भने ।

खेलाडीमा डेंगु भएपछि टोलीले विदेशमा र स्वदेश फर्किएपछि पनि सोचे अनुसारको प्रशिक्षण गर्न नसकेको प्रशिक्षक थापाले बताए ।

यस्तै प्रशिक्षक थापाले खेलाडीहरुलाई अझै केही दिन आरामको खाँचो रहेको बताए ।

मंसिर १५ देखि २४ गतेसम्म हुने सागमा स्क्वासबाट डेंगु प्रभावित दिपक, अमीर, कृष्णा र स्वस्थानीसहित भावना सुनुवार र विपना ब्लोनले सहभागिता जनाउँदैछन् ।

स्क्वासबाट नेपालले टिम इभेन्ट्स र व्यक्तिगततर्फ गरि ४ स्वर्णका लागि प्रतिस्पर्धा गर्ने छन् ।