क्यान निलम्बन फुकुवाकाे सम्भावना कम

काठमाडौँ । अन्तराष्ट्रिय क्रिकेट परिषद् (आईसीसी)ले नेपाल क्रिकेट संघ (क्यान)माथि लगाएको निलम्बन तत्काल हट्ने सम्भावना कम रहेको निर्वाचित कमिटिले बताएको छ ।

नयाँ निर्वाचन लगत्तै क्यान निलम्बन फुकुवा गर्ने आईसीसीले आश्वासन दिएपनि तत्काल सो सम्भावना कम रहेको क्यानको निर्वाचित कमिटिले बुझाई छ ।

क्यान निलम्बन फुकुवा लगायतका विभिन्न एजेण्डामा छलफल गर्न आईसीसीको बोर्ड बैठक आज (आईतबार) दुबईमा बस्दैछ ।

तर आईसीसीबाट निलम्बन फुकुवाको निर्णय हुने सम्भावना कम रहेको क्यानको निर्वाचित कमिटिले बताएको छ ।

क्यानका नवनिर्वाचित महासचिव अशोकनाथ प्याकुरेलले आईसीसीबाट तत्काल क्यान निलम्बनको फुकुवा हुने सम्भावना कम रहेको बताए ।

‘आईसीसीले नेपालको निलम्बन फुकवा गर्छ भन्ने मलाई लाग्दैन ।’ प्याकुरेलले खेलपाटीसंग भने, ‘आईसीसीले नेपाली क्रिकेटको बिषयमा केही न केही निर्णय गर्छ । तर फुकुवा हुने सम्भावना निकै कम छ ।’

आईसीसीले क्यानको नयाँ विधान अनुसार हुने निर्वाचनलाई निलम्बन फुकुवाको पहिलो आधार बनाएको थियो ।

सोही अनुसार काठमाडौंमा गत असोज १० र ११ भएको साधारण सभाले चतुरबहादुर चन्द नेतृत्वको नयाँ कार्यसमितिको निर्वाचन गरेको थियो ।

आईसीसीले बनाएको स्वतन्त्र कमिटिले क्यानको विधान अनुसार जिल्ला, प्रदेश र केन्द्रको संघको निर्वाचन सफलतापुर्वक सम्पन्न गरेको थियो ।

नयाँ विधान अनुसार क्यानको चुनाव आईसीसीको मुख्य शर्त भएपनि अन्य धेरै बिषय मिलाउन बाँकी रहेको महासचिव प्याकुरेलले बताए ।

‘निलम्बन फुकुवा हुनका लागि नयाँ विधान अनुसारनै चुनाब गराउनुपर्ने थियो । त्यो हामीले सम्पन्न गरिसकेका छौ ।’ उनले भने, ’तर निलम्बन हटाउन थप अन्य शर्त जस्तै सरकारी बिषय, निलम्बित क्यानमा देखिएको गुनासो, कार्यालय व्यवस्थापन, काम गर्ने पद्वतीमा थप कुरा सुधार गर्दै अगाडी बढेमा निलम्बन फुकुवाको पाटोमा पुग्ने हो ।’
उनले नेपाली क्रिकेट सकारात्मक बाटोमा जाने निर्णय भने आईसीसीबाट हुन सक्ने बताए ।

‘आईसीसीले निलम्बन फुकुवाका लागि केही शर्तहरु बताउनेछ ।’ प्याकुरेलले थपे, ‘नेपालसंग सहकार्य गर्दै आएका आईसीसीका पदाधिकारीलाई केही निर्देशन प्राप्त हुन सक्छ । सोही अनुसार निलम्बन फुकुवा अर्को प्रक्रियामा जाने छ ।’

महासचिव प्याकुरेलले निलम्बन फुकुवाको निर्णय हुन अझै केही महिना लाग्ने खेलपाटीलाई बताए ।

‘चुनाबको भोलीपल्ट आईसीसीले सकारात्मक रहेको बिज्ञप्ती सार्वजनीक गर्यो तर आईसीसी हरेक बिषयमा प्रक्रियाबाट अघि बढ्ने भएकाले निलम्बन फुकुवामा केही समय लाग्न सक्छ ।’ उनले भने ।

सन् २०१६ मा आईसीसीले सरकारी हस्तक्षेप र अवैधानिक चुनावको कारण देखाउँदै नेपाल क्रिकेट संघलाई निलम्बन गरेको थियो ।

नेपालमाथि लागेको निलम्बन फुकुवा गर्न आईसीसीलेनै सल्लाहाकार समिति गठन गरेर क्यानको नयाँ विधान तयार गरेको थियो ।

लगत्तै सरोकारवाला निकायलाई समावेश गर्दै स्वतन्त्र कमिटिमार्फत क्यानको नयाँ नेतृत्व स्थापित गरेको थियो ।