विश्व जुडोमा मनिता र सोनियाले खेल्ने

काठमाडौं । मोरक्कोमा आयोजना हुने विश्व जुडो च्याम्पियनसिपमा सहभागी हुने नेपाली जुडो टोलीलाई शनिबार बिदाइ गरिएको छ ।

त्रिपुरेश्वरस्थित राष्ट्रिय खेलकुद परिषद् (राखेप) मा आयोजित एक कार्यक्रमका बीच चार सदस्यीय नेपाली टोलीको बिदाई गरिएको हो । दुई खेलाडी सम्मिलित नेपाली टोलीलाई राखेप सदस्यसचिव रमेशकुमार सिलवालले बिदाई गरेका थिए । आगामी अक्टोबर १६ देखि २० सम्म आयोजना हुने विश्व च्याम्पियनसिपमा नेपाली खेलाडी सोनिया भट्ट र मनिता श्रेष्ठ प्रधानले चुनौती प्रस्तुत गर्नेछन् ।

मनिताले ५६ केजीमुनि तौलसमूह र सोनियाले ४८ केजीमुनि तौलसमूहमा प्रतिस्धर्पा गर्नेछिन् । प्रशिक्षकमा चन्द्रकुमार डंगोल र व्यवस्थापकमा लक्ष्मीरत्न तुलाधार छन् । यस विश्व च्याम्पियनसिपमा ८८ राष्ट्रका ३२१ पुरुष र २ सय ३६ महिलाले प्रतिस्पर्धा गर्ने नेपाल जुडो संघका अध्यक्ष दीपकहर्ष बज्रचार्यले जानकारी दिए ।

नेपाली टोलीले यस सहभागीतालाई आगामी मंसिरमा नेपालमै आयोजना हुने १३औं दक्षिण एसियाली खेलकुद(साग)को तयारीको रूपमा समेत लिएको छ । बिदाइको अवसरमा राखेप सदस्यसचिव सिलवालले देशको झन्डासँगै राष्ट्रियता सम्झेर उत्कृष्ट चुनौती प्रस्तुत गर्ने विश्वास व्यक्त गरे ।