एजेन्सी । विश्व टेष्ट च्याम्पियनसिप अन्तर्गत दक्षिण अफ्रिकाविरुद्धको पहिलो टेष्ट क्रिकेटमा भारतले फराकिलो जित निकालेको छ ।
बिशाखापटनममा दक्षिण अफ्रिकालाई २०३ रनको फराकिलो अन्तरले हराउँदै भारतले सिरिजमा सुखद सुरुवात गरेको हो । जितसँगै भारतले तीन खेलको सिरिजमा १-० ले अग्रता बनाएको छ ।
भारतले दिएको ३९५ रनको फराकिलो लक्ष्य पछाएको दक्षिण अफ्रिकाले दोस्रो इनिङ्समा ६३ ओभर ५ बलमा अलआउट हुँदै १९१ रन मात्र बनाउन सक्यो ।
दक्षिण अफ्रिकाका लागि डेन पिएटले ५६ रनको अर्धशतकीय इनिङ्स खेल्दा सेनुरन मुथुसम्यले अविजित ४९ रन जोडे । यस्तै एडीन मार्क्रमले ३९ रन बनाए ।
भारतका लागि मोहमद शामीले ५ विकेट लिए । रबिन्द्र जडेजाको नाममा ४ विकेट रह्यो ।
पहिलो इनिङ्समा दक्षिण अफ्रिकाले ४३१ रन बनाएको थियो । पहिलो इनिङ्समा डीन एल्गरले १६० तथा क्विनटन डी ककले १११ रनको शतकीय इनिङ्स खेलेका थिए ।
यसअघि टस जितेर पहिले ब्याटिङ गरेको भारतले पहिलो इनिङ्समा ५०२ रन बनाएको थियो । भारतका मायाँक अग्रवालले २१५ रनको दोहोरो शतकीय इनिङ्स खेलेका थिए । यस्तै रोहित शर्माले १७६ रनको शतकीय इनिङ्स खेले ।
दोस्रो इनिङ्समा भने भारतले ३२३ रन जोडेर इनिङ्स समाप्तिको घोषणा गरेको थियो । दोस्रो इनिङ्समा भारतका रोहित शर्माले १२७ रनको शतकीय इनिङ्स खेलेका थिए । यस्तै चेतेश्वर पुजाराले ८१ रनको योगदान दिएका थिए । दक्षिण अफ्रिकाका केशव महाराजले २ विकेट लिएका थिए ।
दुई टोलीबीचको दोस्रो टेष्ट बिहिबारबाट पुनेमा सुरु हुनेछ । टेष्ट सिरिजपछि दुई टोलीले एकदिवसीय सिरिज खेल्नेछ ।
