कीर्तिपुर सेमिफाइनलमा

काठमाडौं। कीर्तिपुर पाँचौं बीएमके खुला पुरुष बास्केटबल प्रतियोगितामा मंगलबार सेमिफाइनलमा प्रवेश गरेको छ ।

चण्डोलस्थित आयोजक विशाल मिलन केन्द्र (बीएमके) को कोर्टमा कीर्तिपुरले गोर्खा ब्वाइजलाई ६२–३४ ले पराजित गर्यो ।

कीर्तिपुर समूह ‘ए’ को विजेता बन्दै सेमिफाइनलमा पुगेको हो । कीर्तिपुरका अनिल खड्गीले १७ अंक जोडे । सुरुको क्वाटरमा २१–५ ले अगाडि बढेको कीर्तिपुरले दोश्रोमा १९–६ र तेश्रोमा १४–१० को अग्रता लियो । चौथो तथा अन्तिम क्वाटरमा कीर्तिपुर ८–१३ ले पछि पर्यो ।

समूह चरणको अन्य खेलमा आइस वाकर र गोल्डेनगेटले जित हात पारे । आइस वाकरले एसडीसीलाई ६३–४२ ले हरायो । आइस वाकरका नोर्बु गुरुङले ३१ अंक जोडे ।

गोल्डेनगेटले आयोजक बीएमकेमाथि ८०–६२ को जित दर्ता गर्यो । गोल्डेनगेटका विपिन महर्जनले २१ स्कोर गरे ।