ब्राजिलको भर : 'टिटे'

सन् २००२ को विश्वकप । ब्राजिलले पछिल्लो पटक जितेको विश्वकप ।  जतिबेला ब्राजिलियन टोलीमा त्यस पुस्ताकै उत्कृष्ट खेलाडीहरु रोनाल्डो, रिभाल्डो, रोनाल्डिन्हो थिए ।

सन् २००२ पछिको विश्वकपमा भने ब्राजिलको प्रदर्शन बिर्सनलायक रह्यो । आफ्नै घरेलु मैदानमा भएको सन् २०१४ को को विश्वकपमा त् ब्राजिलियन टोली फिक्का नै देखियो । सेमिफाइनलमा जर्मनीसंगको ७-१ को पराजयले पुरै देशमा सन्नट्टा ल्यायो ।  अब, ब्राजिल फुटबलको भविष्य के हुन्छ त भन्ने प्रश्न सुनिन थाल्यो ।  त्यसबीचमा अब के हुन्छ भन्ने प्रश्न वरिपरि नै ब्राजिलियन फुटबल रुमलियो।  

घरेलु विश्वकपमा खराब प्रदर्शनको कारण फिलिपे स्कोलारीले टिम छाडेपछि त्यहिँ बर्ष डुंगा ब्राजिलको प्रशिक्षक बने । प्रशिक्षक डुंगा तिनै हुन् , जसको नेतृत्वमा ब्राजिल सन् २०१० विश्वकपको अन्तिम आठबाटै बाहिरिएको थियो ।  डुंगा नेतृत्वको ब्राजिल फेरी पनि असफल भयो । सन्२०१५ को कोपा अमेरिकामा ब्राजिल अन्तिम आठ भन्दा माथि जान सकेन । फलस्वरूप ब्राजिलले २० वर्षमा पहिलो पटक कन्फिडिरेसन कपमा छनौट हुने मौका गुमायो।  त्यसयताको प्रदर्शन हेर्दा ब्राजिलियन फुटबल झन् कमजोर हुदै गएको जस्तो देखिन्थ्यो ।

ब्राजिलियन फुटबलमा देखिएको समस्याको महासागर स्वयम् डुंगाले तार्न नसकेपछि 'अब के हुन्छ' भन्ने बहस फेरी सुरु भयो ।  त्यसबीचमा एडेनोर लियोनार्डो बाची यानिकी 'टिटे' कथामा देखिए । टिटे तिनै हुन् जसले कहिल्लै ब्राजिलको राष्ट्रिय टोलीबाट  खेल्न पाएनन् । नत, युरोपियन क्लब फुटबलको स्वाद नै चाख्न पाए । 

बायोडाटा मात्रै हेरेर प्रशिक्षक नियुक्ति गर्ने नीति ब्राजिलियन फुटबल संघले अख्तियार गरेको भए, टिटे यसपटकको विश्वकपमा नेमार एण्ड कम्पनिको नेतृत्व गर्दै रसिया जाने थिएनन् ।  टिटेको बायोडाटा त्यति मजबुत छैन तर उनको क्षमता भने कमजोर होइन ।  टिटेले १६ वटा ब्राजिलियन र मध्य पूर्वी क्लबको प्रशिक्षण सम्हालिसकेका छन् ।  त्यसमध्ये, धेरै क्लबबाट बर्खास्तीमा परेको इतिहास छ । 

खराब इतिहास भएपनि टिटेलाई ब्राजिलको प्रशिक्षक किन बनाइयो त ? कारण स्पष्ट छ, उनले ब्राजिलियन र समग्र दक्षिण अमेरिकी फुटबल नै बुझेका छन् ।  उनलाई ब्राजिलियन खेलाडीको बलियो पक्ष थाहा छ जसलाई उनले विश्वकपमा प्रमुख हतियार बनाउने छन् । ब्राजिलियनको आशा यसैमा रहेको छ ।

५७ बर्षिय टिटेले आफ्नो प्रशिक्षण जीवनमा केहि महत्वपुर्ण उपाधि  जितेका छन् ।  टिटेले कोरिनथियन्सलाई दुई पटक ब्राजिलियन लिगको उपाधि जिताएका छन् । सोहि क्लबबाट फिफा क्लब वर्ल्डकप र दक्षिण अमेरिकी क्लब च्याम्पियनसिप  पनि उचालेका छन् ।

टिटेको बिशेष ध्यान डिफेन्समा रहन्छ ।  त्यसैको नतिजा हो ब्राजिलले विश्वकप छनौटको दौरान देखाएको बलियो रक्षापंक्ति ।  ब्राजिलले छनौट दौरान १८ खेलमा ११ गोल मात्रै खाएको थियो। डिफेन्डरले रुसमा त्यहिँ किसिमको खेल देखाउन सक्छन् या सक्दैनन् भन्ने बिषय टिटेका लागि महत्वपुर्ण हुन सक्छ । 

टिटेका लागि अर्को महत्वपुर्ण परिक्षा भनेको नेयमारलाई कसरी उपयोग गर्ने भन्ने हो ।  फ्रेन्च क्लब पिएसजीका लागि खेल्दा खेल्दै घाइते भएर लामो समय मैदान बाहिर रहेका नेयमार टिटेको प्रमुख हतियार हुन् । करिब तीन महिना मैदान बाहिर रहेका नेयमार क्रोएसियासंगको मैत्रीपूर्ण खेलबाट मैदान फर्किएका थिए ।  उक्त खेलमा नेयमारले एक गोल समेत गरे ।   

नेयमारलाई पनि रुस विश्वकप चुनौती र अवसर दुवै हो । ब्राजिलका लागि धेरै गोल गर्ने खेलाडीको सूचीको चौथो स्थानमा रहेका नेयमारका लागि विश्वकप निकै महत्वपूर्ण छ । किनकि, यसै महासंग्रामबाट नेयमारले विश्व फुटबलमा लियोनल मेस्सी र क्रिस्टियानो रोनाल्डोको विकल्पका रुपमा आफुलाई उभ्याउन सक्छन् ।

र, नेयमारलाई यो उपलब्धि हासिल गर्न टिटेको सहयोग महत्वपूर्ण हुन सक्छ ।  सन् २०१० को विश्वकपमा स्कोलारीले नेयमारलाई पुरै टिमको जिम्मेवारी बोकाएका थिए ।  तर, अहिले स्थिति फरक छ ।  टिममा फिलिप्पे कौटिन्हो , गाब्रियल जिजस, विलियन, रोबर्टो फिर्मिन्हो जस्ता बलिया नामहरु छन् । जसको कारण यो पटक नेयमार एक्लैले ब्राजिलियन टिम बोक्नु पर्दैन ।

टिटेले नेयमारलाई खेल दौरान खुल्ला छाड्न सक्छन्, बिना कुनै थप जिम्मेवारीका साथ ।  जुन, नेयमारका लागि महत्वपुर्ण अवसर हुनेछ ।

टिटे किन ब्राजिलका लागि सहि छनौट हुन त प्रशिक्षक पदका लागि ? स्पष्ट छ, टिटे निडर छन् ।  स्टारले भरिएको ब्राजिलियन  टिमलाई नेतृत्व दिन सक्छन् ।  टिटेले कुनै एक खेलाडीको इगोले पुरै टिमको माहोल बिग्रन दिदैनन् ।  नेयमार जस्ता खेलाडीबाट खेल दौरान हुनसक्ने अस्वभाविक खराब व्यवहारलाई रोक्न सक्छन्   त ? भन्ने प्रश्न आउन सक्छ । तर, टिटेले सक्छन् , किनकी टिटे खेलाडीसँग खुल्ला रुपले कुरा गर्छन् ।  टिटेको धेरै खुबी मध्येको एक उनको 'ओपन डिस्कसन' हो ।  कम्तिमा ब्राजिलमा यसो भन्ने गरिन्छ । 

टिटेले घोषणा गरेको ब्राजिलियन टोलीको बिषयमा यो पटक धेरै टिकाटिप्पणी भएन ।  कारण, उनले कुन कुन खेलाडीलाई टिममा समावेश गर्दैछन भन्ने लगभग पहिलै थाहा भईसकेको थियो । टिम छनोटको केहि महिना अगाडी नै उनले प्रमुख खेलाडी यी हुनेछन् र बाँकी यी खेलाडीले प्रतिस्पर्धा गर्ने छन् भन्ने खुलाएका थिए। 

प्रशिक्षक टिटेको पहिलो रोजाईको गोलकिपरमा इटालियन क्लब एस रोमाका एलिसन हुनेछन भने म्यानचेस्टर सिटीका एडर्सन बेञ्च मा हुने छन् ।  सेन्ट्रल डिफेन्समा को पहिलो रोजाईमा पर्छ भन्ने एकिन छैन् । पिएसजीका थिएगो सिल्भा, मर्किन्यास र इन्टर मिलानका मिराण्डाले सो स्थानका लागि प्रतिस्पर्धा गर्ने छन् ।  फुल्ब्याकमा भने म्यानचेस्टर सिटिका डानिलो र रियल मड्रिडका मार्सेलो रहने पक्का जस्तै छ ।   

यस्तै प्लेमेकर कौटिन्होले कुन स्थानमा खेल्छन भन्ने पक्का छैन ।  उनलाई टिटेले फरवार्ड लाइनमा नेयमार र जिजससंग खेलाउन सक्नेछन । उनलाई मिडफिल्डमा प्लेमेकरको भूमिकामा प्रयोग गर्ने सम्भावाना पनि उतिक्कै छ । कासिमिरो, पौलिन्हो र फर्नानडिन्हो मिडफिल्डका लागि पहिलो रोजाईमा पर्ने सम्भावना रहेका खेलाडी हुन् । 

यसपटक ब्राजिलको बेञ्च पनि उतिकै बलियो छ। भर्खरै सकिएको युरोपेली सिजनमा आ आफ्नो क्लबबाट उत्कृष्ट प्रदर्शन गरेका खेलाडीहरु रोबर्टो फिर्मिनो, विलियन, डौग्लास कोस्टा, फ्रेड लगायतका खेलाडीले कुनै पनि समय बेञ्चबाट आएर खेल परिवर्तन गर्ने क्षमता राख्छन् ।  

ब्राजिलमा अहिले राष्ट्रपतीय चुनाव गर्ने र टिटेलाई उम्मेदवार बनाउने हो भने सिधै टिटेले जित्छन् भन्ने भनाई पनि छ । विश्वकप छनौटमा ब्राजिलले गरेको प्रदर्शनको आधारमा टिटेको देशव्यापी लोकप्रियता बढेको छ । विश्वकपपछि त्यो कायम रहला वा घट्ला ? त्यो हेर्न बाँकी छ । तर,  एउटा सत्य पक्कै के हो भने ब्राजिलले विश्वकपको  लगातार तीन संस्करण खेर फालेको छ, निरस खेल खेलेको छ ।

यो विश्वकप समग्र ब्राजिलका लागि महत्वपुर्ण छ ।  टिटेका लागि पनि महत्वपुर्ण छ, किनभने यो पटक उनलाई आजीवन नायक बन्ने मौका आएको छ ।