धमलालाई इन्टरनेसनल अवार्ड

काठमाडौं । नेपाल आइटिएफ तेक्वान्दो महासंघका अध्यक्ष अन्जन धमलाले इन्टरनेसनल इस्ट्रक्टरको अवार्ड प्राप्त गरेका छन् ।

अध्यक्ष धमलाले अन्तर्राष्ट्रिय तेक्वान्दो महासंघले प्रदान गर्ने इन्टरनेसनल इस्ट्रक्टर अवार्ड प्राप्त गरेका हुन् ।

बुल्गेरियाको प्लामोदीप शहरमा सोमबार आइटिएफको २७ औं कंग्रेसले धमलालाई अन्तर्राष्ट्रिय अवार्डबाट सम्मानित गरेको छ ।

आइटिएफ महासंघले विभिन्न राष्ट्रका पदाधिकारी तथा प्रशिक्षकबाट उत्कृष्ट ब्यक्तित्वलाई छनोट गरि प्रत्येक दुई–दुई वर्षमा सम्मान गदै आएको छ । 

अवार्ड प्राप्त गरेपछि धमलाले यो अवार्ड आफ्नो लागि मात्र नभई समग्र नेपाली खेलकुद विकासको लागि महत्वपूर्ण रहेको बताए ।

आइटिएफ तेक्वान्दोका राष्ट्रिय खेलाडी हाल नेपालका अध्यक्ष तथा दक्षिण एसियाली आइटिएफका वरिष्ठ उपाध्यक्ष समेत हुन् । उनी करिब दुई दशकदेखि यो खेलमा सक्रिय छन् ।

वि.सं. २०५४ सालदेखि डब्लुटिएफ तेक्वान्दोबाट आफ्नो खेल करियर आरम्भ गरेका धमलाले पछि आइटिएफ खेलाडी हुँदा त्यसको नेतृत्व समालेका थिए । धमलाले नेपालका विभिन्न जिल्लामा आइटिएफ तेक्वान्दो खेल विकास गर्न महत्वपूर्ण भूमीकासमेत खेलेका छन् ।