काठमाडौं । नेपाल क्रिकेट संघ (क्यान)को नयाँ नेतृत्वको निर्वाचन असोज ४ भित्र सम्पन्न गर्ने गरि तयारी अघि बढेको छ ।
क्रिकेट विवाद समाधानका लागि अन्तराष्ट्रिय क्रिकेट काउन्सिल (आईसीसी)को गठन गरेको स्वतन्त्र कमिटिले क्यानको केन्द्रिय निर्वाचन सम्पन्न गर्न दुई मिति प्रस्ताव गरेको हो ।
कमिटिले भदौको अन्तिम वा असोजको पहिलो साताभित्र क्यानको केन्द्रिय निर्वाचन सक्ने गरि आईसीसीलाई मिति प्रस्ताव गरेको छ ।
आईसीसीले विवाद समाधानको रोडम्याप अनुसार सेप्टेम्बरभित्र निर्वाचन प्रक्रिया सक्ने गरि काम अघि बढाउन स्वतन्त्र कमिटिलाई आग्रह गरेको थियो ।
सोही अनुसार स्वतन्त्र कमिटिले भाद्र २८–२९ र असोज ३–४ को केन्द्रिय निर्वाचनको मिति आईसीसीमा प्रस्ताव गरेको छ ।
‘सबै बिषय सहज रुपमा अगाडी बढेमा असोज ४ भित्र क्यानको केन्द्रिय निर्वाचन सक्ने गरि दुई मिति प्रस्ताव गरेका छौ ।’ स्वतन्त्र कमिटिका एक सदस्यले खेलपाटीसंग भने ।
आईसीसीको अर्को बोर्ड बैठक अक्टोबर १३ मा बस्ने तयारी छ । सोही बैठक मार्फत क्यान निलम्बनको फुकुवा अघि बढ्ने विश्वास गरिएको छ । त्यसका लागि सेम्टेम्बरभित्र सम्पुर्ण निर्वाचन प्रक्रिया सम्पन्न हुनुपर्नेछ ।
स्वतन्त्र कमिटिले गण्डकी प्रदेश सहित प्रदेश नम्बर १ र प्रदेश नम्बर ७ को निर्वाचन सम्पन्न गरिसकेको छ ।
प्रदेश १ मा हिजो (शनिबार) मात्र मिङ्मा डन्डु शेर्पा नेतृत्वको प्रादेशिक क्रिकेट संघ गठन भएको छ । यस्तै गण्डकीमा देबेन्द्र प्रजु र सुदुरपश्चिममा हरी रेग्मी नेतृत्वको प्रादेशिक क्रिकेट संघ गठन भईसकेको छ ।
अब प्रदेश ५, ३ र २ को निर्वाचन हुन बाँकी छ ।
प्रदेश ५ को प्रादेशिक निर्वाचन भदौ ७ गते आयोजना गर्ने गरि निर्वाचन कार्यतालिका सार्वजनीक गरिएको छ । प्रदेश ५ अन्तर्गत बाँके जिल्लाबाट उपेन्द्र पौडेलले निर्वाचनमा सहभागी गराउन माग गर्दै अदालतमा मुद्वा दायर गरेका थिए । अदालतमा मुद्वा दायर भएपनि पौडेललाई सहमतीमा ल्याउने अनौपचारिक प्रयास जारी गरेको निर्वाचनमा सहभागी एक अधिकारीले खेलपाटीलाई बताए ।
यस्तै, प्रदेश २ मा विवादीत देखिएको पर्सा जिल्ला क्रिकेट संघको समेत हिजो (शनिबार) निर्वाचन सम्पन्न भएको छ । योसंगै प्रदेश २ को प्रादेशिक निर्वाचन गर्ने सहज देखिएको छ । निकै विवादीत देखिएको प्रदेश ३ को काठमाडौंको जिल्ला निर्वाचन समेत साउन २८ गते हुदैछ ।
प्रादेशिक चुनाव सम्पन्न भएसंगै क्यानको केन्द्रिय निर्वाचनको प्रक्रिया अघि बढ्नेछ ।
‘अगष्टभित्र प्रादेशिक र सेप्टेम्बरभित्र केन्द्रिय निर्वाचन गर्दै क्रिकेटको नयाँ नेतृत्व चयन गर्ने प्रक्रिया अघि बढेको छ ।’ स्वतन्त्र कमिटिका सदस्य एलबी क्षेत्रीले भने ।
