काठमाडौं । स्थान, लगनखेलस्थित आर्मीको शारिरिक तथा तालिक केन्द्र ।
राष्ट्रिय पुरुष भलिबल टिमका १८ खेलाडीलाई दुई टिममा बाडिएको छ । एकातिर बसेर प्रशिक्षक हान एबिङ खेलाडीलाई निर्देशन दिईरहेका छन् ।
सोमबार दिउँसो आर्मी कभर्डहलभित्र छिर्दै गर्दा पहिलो नजरनै खेलाडीको रोमान्चक खेलमा पुग्यो । प्रतिस्पर्धा हेर्दा कुनै प्रतियोगिताको उपाधि भिडन्त भन्दा कम लाग्दैन थियो ।
तर, खेलाडी कुनै उपाधि भिडन्तको प्रतिस्पर्धामा नभएर एक बिशेष प्रतियोगिताको तयारी गरिरहेका थिए ।
प्रतियोगिता अर्थात एभीसी सेन्ट्रल जोन भलिबलको ।
जुन प्रतियोगिता नेपालले पहिलो पटक आयोजना गर्दैछ, जो साउन मसान्तबाट सुरु हुदैछ ।
सोमबार दिउँसो प्रशिक्षणमा व्यस्त सबै खेलाडी पसिनाले निथ्रुक्क भिजेका थिए । दैनिक कभर्डहलमा प्रशिक्षणमा आउनु अनि कडा मेहनत गर्नु खेलाडीको नियमित दिनचर्या बनेको छ ।
खेलाडीहरु प्रशिक्षणमा मग्न थिए । उनीहरुको खेलप्रतिको लगाब गज्जबको देखिन्यो । उनीहरु विपक्षीमाथि उत्तिकै निर्मम तरिकाले प्रहार गर्थे ।
सबै खेलाडी आफुलाई प्रमाणित गर्न हर सम्भव मेहनत गरिरहेका थिए ।
केही बेरमा प्रशिक्षण सकियो । खेलाडीहरु वामअर्पमा लागे ।
सबै खेलाडीलाई प्रशिक्षक एबिङले एक ठाउँमा भेला पारेर प्रशिक्षणको ब्रिफिङ गरे । केही मिनेटमा प्रशिक्षकले दिनको अभ्यास सकिएको जानकारी दिए ।
अनि नजर कप्तान इमराना मगरसंग मोडियो ।
उनकै कप्तानीमा पछिल्लो समय राष्ट्रिय र अन्तराष्ट्रिय प्रतियोगितामा नेपाली टिमले प्रतिनिधित्व गरिरहेको छ । उनकै नेतृत्वमा नेपालले एसियन गेम्समा उत्कृष्ट प्रर्दशन गर्दै एसियाली वरियता प्राप्त गर्न सफल भएको थियो ।
उनले सुरुमै तयारी निकै जोडतोडको साथ चलिरहेको बताए ।
प्रतियोगिता घरेलु मैदानमै हुने भएकाले खेलाडी समेत निकै उत्साहीत रहेको उनले सुनाए ।
‘टिमका सबै खेलाडीले आफ्नो क्षमता अनुसारको अभ्यास गरिरहेका छन् ।’ उनले भने ।
‘टोलीको बढी समस्या रिसिभिङमा हो । अभ्यासको क्रममा त्यसमै बढी केन्द्रित भएर प्रशिक्षण गरिरहेका छौ ।’ उनले थपे ।
कप्तान इमले डच प्रशिक्षक एबिङको समेत खुलेर प्रशंसा गरे ।
‘नेदरल्याण्डबाट हामीलाई प्रशिक्षण गराउन आउनुभएको छ । उता पनि धेरै राम्रो टिमलाई प्रशिक्षण गराउनु भएको रहेछ । कमी कमजोरीलाई सुधार गर्दै लैजानुभएको छ ।’ प्रशिक्षकबारे इम भन्छन् ।
‘यसअघिका प्रशिक्षक युवा हुनुहुन्थ्यो । तर अहिलेको प्रशिक्षक निकै परिपक्क हुनुहुन्छ । साना कमजोरीलाई समेत औल्याउनुहुन्छ ।‘ एबिङको प्रशिक्षणबारे इमले भने, ‘अरु प्रशिक्षक समुहमा राखेर गल्ती सुधार्ने कोशिश गर्छन् । उहाँ एक्लै राखेर खेलाडीको कमजोरी सुधार गर्न खोज्नु हुन्छ । यसले खेलाडीको प्रर्दशन सुधारमा सहयोग पुग्छ ।’
एभीसी सेन्ट्रल जोन पुरुष सिनियर भलिबल प्रतियोगितामा नेपाली टिम तयार गर्न डच प्रशिक्षक हान एबिङ काठमाडौं आएका हुन् । उनलाई अन्तराष्ट्रिय भलिबल महासंघ (एफआईभीभी) ले प्रशिक्षण दिन नेपाल पठाएको हो ।
उनको सबै खर्च एफआईभीभीले ब्यहोर्नेछ । नेपाली टिमले अन्तराष्ट्रिय स्तरमा सफल प्रशिक्षकसंग बसेर भलिबलको कला तिखार्ने मौका पाएको छ ।
कप्तान इम नयाँ प्रशिक्षकको खेल अनुभवबाट निकै प्रभावित छन् ।
सबै प्रशिक्षकले सिकाउने तरिका एउटै भएपनि उमेरले परिपक्क बनेका प्रशिक्षकसंग धेरै अनुभव हुने उनको कथन छ ।
‘खेलाडीमा आएको साना समस्यालाई पनि गहिरिएर सिकाउने प्रशिक्षकको बानी छ ।’ इमले खुलाए ।
‘खेलाडीमा आएको सानो समस्यालाई पनि प्रशिक्षकले सिकाईरहनु हुन्छ । खेलाडीलाई व्यक्तिगत रुपमा सिकाउनु हुन्छ ।’ उनले भने, ‘यत्तिको राम्रो प्रशिक्षक धेरै समय पाएमा नेपाली भलिबल धेरै राम्रो हुने थियो ।’
एभीसी सेन्ट्रल जोनको प्रशिक्षणमा रहेको नेपाली टिमको तयारीलाई आसन्न दक्षिण एसियाली खेलकुद प्रतियोगिता सागको तयारीको रुपमा समेत लिईएको छ ।
‘सागका लागि केही राम्रो होला भन्ने आश छ । अहिले सुविधा पनि बढेको छ । पुरस्कार पनि बढेको छ । यसले गर्दा खेलबाटै राम्रो भविष्य बनाउन सकिने अवस्था छ ।’ राष्ट्रिय टोलीको प्रशिक्षणमा व्यस्त रहेका स्पाइकर कुलबहादुर थापा (हरि) ले भने ।
यस्तै हरिले नेपालको प्रर्दशनलाई निखार ल्याउन हरेक महिना अन्तराष्ट्रिय मैत्रीपूर्ण खेल हुन आवश्यक रहेको बताए ।
‘मैत्रीपूर्ण खेलबाट हाम्रो स्तर जाँच हुन्छ । यसले गर्दा खेलमा सुधार हुँदै जान्छ । त्यसैले मैत्रीपूर्ण खेल खेलाडीलाई एकदम आवश्यक छ ।’ उनले थपे ।
