क्रिकेटकी मनकेसी 'पारा वर्ष खेलाडी'

काठमाडौं । नेपाली राष्ट्रिय महिला नेत्रहिन क्रिकेट टोलीका सदस्य मनकेसी चौधरी 'पारा वर्ष खेलाडी' घोषित भएकी छिन् ।

नेपाली टोलीका अलराउण्डर मनकेसीले एनएसजेएफ बजाज पल्सर स्पोर्ट्स अवार्डमा 'पारा वर्ष खेलाडी' घोषित भएकी हुन् ।

नेपाली नेत्रहिन क्रिकेटमा उनको प्रदर्शनको कदर गर्दै नेपाल खेलकुद पत्रकार मञ्चले मंगलबार मनकेसीलाई पारा वर्ष खेलाडीबाट सम्मानित गरेको हो ।

'पारा वर्ष खेलाडी' घोषित भएसंगै मनकेसीले ५० हजार रुपैयाँसहित विभिन्न गिफ्ट ह्याम्पर प्राप्त गरिन् ।

२१ वर्षिया चौधरीले विस २०६५ सालदेखि नेत्रहीन क्रिकेट खेल्न सुरु गरेकी थिईन । गतवर्ष पाकिस्तानविरुद्धको ४ खेलको सिरिजमा मनकेसीले उत्कृष्ट प्रदर्शन गरेकी थिईन् । नेपाललाई चारवटै खेल जिताउन मुख्य भूमिका निभाउने क्रममा उनले सर्वाधिक १ सय ८३ रन बनाएकी थिईन् ।

दुई अर्धशतक प्रहार गर्दै नेपालको लागि पहिलो अर्धशतक बनाउने खेलाडीको कीर्तिमान पनि उनले रचिन्। उनी दुई खेलमा प्लेअर अफ दि म्याच समेत घोषित भएको थिईन् । यस्तै बी टू क्याटेगारीमा उनी प्लेयर अफ द सिरिज बनेकी थिईन्।

पाकिस्तान जानुअघि पनि नेपालमा भएको पारा च्याम्पियनसीप अन्तर्गत महिला नेत्रहीन क्रिकेट सिरिजमा मनकेसीको टिम च्याम्पियन बनेको थियो। उनको टिम माछापुच्छ्रेले टिम सगरमाथालाई पराजित गर्दा मनकेसी वुमन अफ दी म्याच भएकी थिइन्।

यस्तै सन् २०१४ मा नेपालमा ब्रिटेनसँग खेलेको तीनवटै टी-२० खेल जित्दा उनी सबै खेलमा उत्कृष्ट खेलाडी घोषित भएकी थिइन् ।